Cambio den sistema digital cu declaracion di impuesto pa parehanan casa

Relacionista Publico di DIMP, Meverly Romano ta anuncia:

ORANJESTAD (AAN)-- Relacionista Publico di Departamento di Impuesto Aruba (DIMP), señora Meverly Romano, den entrevista cu Matutino DIARIO a anuncia e cambio cu ta bay bin pa loke ta trata declaracion di impuesto pa pareha casa, door di e sistema digital.

Romano a señala cu ora DIMP a saca e  papel di declaracion den pasado, nan ta saca pa parehanan casa un solo formulario cu ta sali riba nomber di e homber.

“E ora ey tur dos ta yena e formulario di declaracion aki, ambos ta firm’e, y nan ta entreg’e cerca nos.

Den e sistema online, no ta rekeri pa ambos pareha tin un account di Bo Impuesto (BOI). Kiermen e señora ta log den su papel, y e homber ta log den su papel. Nan dos ta yena nan formulario di declaracion y cada un ta entrega esaki, pero e formulario no ta bay drenta Departamento di Impuesto, tanten cu tur dos entrega e formulario.

Kiermen e homber ta firma su formulario digital, e ta entregue, pero tanten cu e señora no firm’e y entreg’e tambe e formulario no ta yega na DIMP”, señora Romano a reitera.

El a agrega cu esaki ta nifica cu señoranan casa lo mester custumbra cu’ne, pero tambe por haya tambe cu den un pareha kizas hende homber ta esun cu ta yena e formulario, anto e señora ta autoriza su casa, via su portal, pa yena e formulario p’e, firm’e tambe y mand’e p’e. Asina señora Meverly Romano, PR di DIMP a declara.

“Kiermen, tur cos cu ta posible aworaki riba papel lo ta posible, solamente cu awo ta bay sosode riba sistema digital. Ora cu e periodo yega, nos lo duna e detayenan con esey ta bay sosode”, Meverly Romano a señala.