No tin mucho motivacion bou di docentenan

Segun Magaly Brito di SEPPA:

 * E di dos fase pa mehora posicion pa trahadonan den enseñansa no a cuminsa ainda 

ORANJESTAD (AAN): “Tocante e tema di enseñansa en general, no tin mucho motivacion bou di e docentenan recientemente”, asina señora Magaly Brito di SEPPA a expresa den un entrevista cu DIARIO. 

El a expresa cu no tin un aña ainda cu a atende e tema den diferente fase pa mehora e posicion di esnan cu ta traha den e tereno di enseñansa. E prome fase, segun Brito, apesar di algun ‘kinderziektes’, toch a yuda esnan den enseñansa. 

E di dos fase no a cuminsa segun e temporada cu a propone, cu ta desde februari/ maart pero toch tawatin intento pa cuminsa. Pa esaki SEPPA a haci un peticion pa reuni cu Minister di Enseñansa Gerlien Croes. “Lastimamente ainda no a acorda un fecha pa e reunion aki tuma luga. Nos ta pendiente di dje pasobra ey nos lo busca manera pa resolve hopi dolor di esnan cu ta traha den enseñanda,“ señora Brito a expresa. 

Entre otro, el a menciona, cu mester resolve a falta di personal den enseñansa. Tambe e disatisfaccion pa henter e sistema cu segun e docentenan, ya no ta funciona. 

Ariba esaki, señora Brito a agrega cu tin hopi reclamo fuerte di hopi docente cu ta sinti falta di siguridad na pia di trabou. Entre otro el a menciona e gruponan cu ta cay bou di SPO. Docentenan ta reclama cu e hobennan di awendia no ta mescos, hopi ta carga pesonan social riba nan y ta descarga esakinan na scol riba otro hoben y docentenan. Esaki, el a menciona ta crea un falta di siguridad enorme. 

“Esakinan ta tema cu nos a pone na atencion di e minister caba y ta spera cu tin solucion definitivo y efectivo pa e aña escolar nobo si no por spera mas problema den enseñansa”, señora Brito a enfatisa.