Maneho di desperdicio ta responsabilidad di Gobierno y no di Aruba Tourism Authority

Parlamentario Dangui Oduber:

ORANJESTAD (AAN): Minister encarga cu Turismo, Wendrick Cicilia, a presenta den Parlamento pa debati tocante un contrato cu Aruba Tourism Authority (ATA) a firma pa un zona di desperdicio. Durante e reunion aki, Parlamentario Dangui Oduber a cuestiona formalmente e decision di e mandatario pa laga ATA financia y carga cu e costonan di e proyecto aki. Segun e parlamentario, no por ta asina cu, unabes mas, ta uza ATA como e “banco” di Gobierno pa financia proyectonan cu ta bay contra di su propio obhetivonan institucional. 

E ‘Core Business’ di ATA

Oduber a enfatisa cu e fondonan di ATA ta wordo uza pa proyectonan cu ta totalmente fuera di su meta principal. El a recorda cu e core business di ATA, conforme su ley operacional, ta netamente pa:

• Mercadea Aruba internacionalmente;
• atrae turistanan di Calidad;
• y enfoca riba e producto Aruba. 

"Maneho di desperdicio no ta un tarea di ATA, sino un responsabilidad directo di Gobierno di Aruba. Ta p’esey pueblo ta paga impuesto; pa Gobierno por garantisa un maneho structural cu ta mantene nos isla limpi," Oduber a señala. 

Oduber a cuestiona: “Desde ki tempo e Minister di Turismo mester ta esun encarga pa busca solucion pa e problema di desperdicio na Aruba?” El a califica e situacion aki como un "novum" caminda un ministerio cu tin otro meta institucional mester bay soluciona un problema cu e propio Gobierno mes no kier of no tin interes pa resolve. Pa e parlamentario, esaki ta un prueba mas cu e Gobierno actual ta uno caotico, sin liderazgo y sin direccion. 

Gobierno tin e fondonan, pero falta prioridad

E parlamentario a aclara cu e necesidad di tin un zona di desperdicio ta un realidad y cu e no ta contra e decision aki, sino cu al contrario e ta consider'e como algo positivo. Pa Oduber, e problema no ta e zona di desperdicio mes, ni e compania (sea publico of priva) cu ta bay maneha esaki. 

Loke e ta cuestiona ta e decision di uza fondonan di ATA, specialmente ora cu Gobierno tin un surplus di 500 miyon florin. El a enfatisa cu ta tarea, obligacion y responsabilidad di Gobierno mes pa soluciona e problema di sushedad, y p’esey ta Gobierno ta esun cu mester financia e zona di desperdicio aki, ya cu esaki no ta un responsabilidad di e Ministerio di Turismo, y mucho menos di ATA.