Contraloria General ‘a alerta Parlamento’ riba e ley di fondo di Inversion

Parlamentario Endy Croes:

ORANJESTAD (AAN): Durante luna di juni, Parlamento di Aruba a trata e ley di Fondo di Inversion; un iniciativa di Minister Geoffrey Wever, caminda lo aloca un suma inicial di 43 miyon Florin di pueblo pa varios inversionnan.

   Parlamentario Croes a señala cu, prome cu e debate, Parlamento a ricibi e rapport "Buiten beeld, buiten controle" (7 di mei 2026) di Contraloria General (Algemene Rekenkamer Aruba), alertando riba e risiconan di e fondonan aki. El a subraya cu ARA a duna un presentacion special den Parlamento pa insisti riba e necesidad di exigi cambionan y ahustenan structural prome cu aprobacion. E unico obhetivo di esaki ta pa garantisa e control democratico y financiero necesario pa evita ripiticion di erornan di pasado.

   Lesnan di pasado: FDN, Bo Aruba y e Importancia di Control Financiero

   E advertencia di ARA ta fundamenta riba e experiencianan doloroso di pasado, caminda fondonan publico a desvia for di nan meta original:

   (1) Fondo di Desaroyo Nobo (FDN - 1999): Funda bou di e gobierno di AVP cu e meta pa enfoca riba e desaroyo y revitalisacion di San Nicolas. Sinembargo, e fondo aki a resulta den un caso penal grandi di fraude y corupcion, caminda politiconan, contratistanan amigo y ambtenaarnan a wordo condena penalmente pa desviacion di fondonan publico. Entre e sentencianan principal, ex-minister di Finansa Tico Croes a haya un castigo di 10 luna di prizon y 240 ora di trabao comunitario.

  (2) Rapport Bo Aruba (2018): Un investigacion di ARA riba e proyectonan di AVP entre 2010-2017, cu a costa e pais un suma astronomico di 1,600 miyon Florin. E rapport a saca na cla deficiencianan grave y hopi proyecto cu simplemente nunca a wordo finalisa. E mesun falta di control aki ta loke eventualmente a hiba ex-minister Benny Sevinger na wordo condena y sera den KIA.

   E ehempelnan aki ta mustra pakico e alertanan di ARA mester wordo tuma na serio pa evita erornan di pasado.

   Recomendacionnan pa transparencia y control: Pa evita cu un fondo ta keda "buiten beeld" y "buiten controle", ARA a duna recomendacionnan primordial dirigi riba transparencia, cumplimento legal y control administrativo:

  Establece un cuadro di maneho coherente: Desaroya criterianan cla pa institui, organiza, supervisa y evalua e fondonan aki. E cuadro aki mester wordo aproba formalmente y discuti cu Parlamento.

Fortalece e maneho y definicion di responsabilidad: Mester determina explicitamente ken ta responsabel pa e maneho, ehecucion, supervision y dunamento di cuenta (accountability) di cada fondo.

Garantisa cumplimento legal: Percura pa e fondo ta cuadra estrictamente cu e leynan di contabilidad di e pais.

  Fraccion di MEP no por sostene e ley sin e cambionan! Como cu ni Gobierno ni Minister Geoffrey Wever a incorpora e recomendacionnan critico aki den e concepto final di e Ley di Fondo di Inversion, fraccion di MEP no por a duna su voto di sosten na e ley manera cu e tabata.

   "Lamentablemente, parlamentarionan di AVP y Futuro a 'bulldoze' y aproba e ley aki sin considera e cambionan necesario pa garantisa control. Cualkier dia cu dicidi di introduci e reformanan aki pa asina por tin un mihor control riba placa di pueblo, nan por conta cu nos sosten," Parlamentario Endy Croes a conclui.