Awe sentencia ta cay pa Israel Paesch kende a tira su primo mata

Fiscal a exigi 13 aña di prison y paga e daño di 11 mil florin

ORANJESTAD (AAN): Awe merdia, Hues di Corte di Husticia, ta dicta sentencia den e lamentable caso caminda Israel Paesch (40) riba 23 Augustus 2025 a tira mata su primo Rene Paesch.

   Tratamento di e caso a tuma lugar luna pasa caminda durante tratamento di e caso ta sali na cla cu riba 23 Augustus 2025 den oranan di marduga pafor di Lekker Bar, Rene lo a maltrata Israel y despues na cas di Israel e tiramento a sosode.

TIRA RENE MATA

Hues a bisa cu na Coba Lodo na cas di Israel, e tiramento di Rene a sosode. Hues a puntra Israel kico a pasa. Israel a bisa cu e tabata den su auto para y a scucha Rene tabata grita. Ora el a sali, Rene tabata patras di e auto. Segun Israel, ainda e tabata na sanger di e maltrato di Lekker Bar. El a bisa Hues cu Rene a bis’e cu awor e lo mat’e. Israel tabatin e arma den man y a tira Rene. Hues a puntra Israel si el a mira Rene cu un arma. Segun Israel, e sa cu Rene ta cana tur ora arma y el a pensa; of te of ta Rene. E tabata mira e parti ariba di Rene y no a tuma chens y a tira. Ta asina cu e momento ey Rene no tabatin arma cu ne. Segun Israel, Rene a sigui cana bin riba dje y nan a cuminsa bringa. E momento ey e ruman homber di Israel, G., tabata grita pa stop. Segun Israel, e momento ey e no tabata sa cu el a herida Rene pasobra e no a mira sanger.

   Hues a puntra Israel si el a bringa pa caba cu Rene of pa defende su mes. Segun Israel, el a bringa pa defende su mes.

   Hues a bisa cu e ruman di Israel, G. a bisa Polis cu el a tende tiramento y a sali pafor. El a mira dos hende tabata bringa. El a mira Israel tabata riba Rene. El a coy e pistool for di Israel y pone e arma riba haula di galiña. Un otro testigo, dama, a bisa cu el a tende 3 tiro y a bay wak. El a mira un brommer sendi y benta abao. El a mira Rene riba suela y G. y Israel tabata bati Rene. El a grita nan, kico nan tabata haci. E ora ey nan a stop. El a mira cu Rene tabatin slanan na cara y tabata hala rosea pisa. El a bay paden pa coy cellular y yama Polis. El a mira Israel a bay paden y bolbe pafor y bay riba Rene y maltrat’e atrobe. Despues el a scucha Israel bisa: “mi a mat’e”. Ora e dama a bay serca Rene, el a mira cu Rene tabata hala ultimo rosea y a fayece.

PROBLEMA MENTAL

Hues a mustra cu tanto Psicologo como Psychiater a conclui cu Israel ta menos responsabel pa loke a sosode. Nan a mustra cu humamento di marihuana y uso di alcohol a hunga un rol grandi den esaki. E expertonan ta haya cu Israel mester di tratamento bou guia di Reclassering.

FISCAL A EXIGI 13 AÑA

   Fiscal ta haya cu ta Israel mes a busca e confrontacion. Na opinion di Fiscal, despues di e problema na Lekker Bar, Israel a tuma venganza contra Rene y a provoca Rene. Fisal ta haya cu Israel mes a bay tira riba e cas na Sabania Abao y provoca Rene pa bay na cas di Israel. Fiscal a mustra cu Israel por a los tiro di advertencia, core bay, yama pa ayudo. Pero Israel a los 4 tiro riba e parti ariba di curpa di Rene. Fiscal a bisa cu e ta tene cuenta cu e raport di psicologo y psychiater. El a exigi 13 aña di prison pa Israel y cu mester ordena Israel paga e daño di 11 mil florin y pone medida di pago.

ACTUA DEN DEFENSA PROPIO

E abogado mr. Arendsz Marchena a bisa cu Rene a bay na cas di Israel pa regla cuenta cu Israel. Na opinion di abogado, Israel tabata panico den situacion pa sobrevivi di Rene, kende a expresa cu lo bay mat’e. E abogado a mustra cu Psicologo y Psychiater a mustra cu Israel tabata menos responsabel pa su actonan. E abogado ta haya cu e hecho cu Rene a bisa Israel cu e lo bay mat’e a haci cu Israel a actua den defensa propio. E abogado a bisa Hues pa declara Israel liber di a tira mata Rene.

   DIARIO lo informa lectornan kico ta e decision di Hues den e lamentabel caso aki.