Hunta di Supervision di Fundacion Lotto pa Deporte ta nombra  William Erasmus como CEO nobo

ORANJESTAD (AAN): Diaranson 8 di juli, Hunta di Supervision di Stichting Fundacion Lotto pa Deporte ta orguyoso di anuncia

cu Sr. William Erasmus a wordo nombra oficialmente como Chief Executive Officer (CEO) di St. Fundacion Lotto pa Deporte, for di 1 di augustus 2026. 

E nombramento aki a sigui un proceso di reclutamento y seleccion amplio y transparente, den cual varios candidato cualifica a wordo evalua riba nan experiencia, liderato, vision estrategico y compromiso cu desaroyo di deporte na Aruba. Despues di un evaluacion cuidadoso, William Erasmus a sobresali como e candidato cu ta cumpli miho cu e perfil y vision di e fundacion. 

William ta un lider ehecutivo cu experiencia amplio den desaroyo deportivo, comunicacion strategico y administracion di organizacionnan publico. Durante su funcion na Instituto Biba Salud y Activo (IBiSA), e la lidera programa nacional, dirigi ekiponan multidisciplinario y maneha presupuestonan significante, logrando resultado concreto den participacion den deporte y bienestar di comunidad. 

William a fungi como Director Interino, Hefe di Deporte y Movecion y Hefe di Comunicacion C Informacion. Den su funcionnan el a fortalece colaboracion entre stakeholdernan, scolnan, federacionnan deportivo y organizacionnan comunitario, creando

oportunidadnan sostenibel pa deporte na Aruba. Ademas, como fundador di diferente organisacionnan deportivo, William a contribui activamente na promocion di un estilo di bida activo y na crecemento di deporte local. 

Como CEO, William lo enfoca riba fortalece e impacto di St. Fundacion Lotto pa Deporte den financiamiento y sostenemento di deporte na Aruba. Su vision ta pa amplia oportunidadnan pa atleta, federacionnan y organizacionnan deportivo, impulsando innovacion, transparencia, bon gobernacion y colaboracion estrategico. Un prioridad tambe lo ta fortalece e capacidad di e fundacion pa genera mas entrada financiero door di innovacion den productonan di loteria y mehora servicio, asina por sigui inverti den deporte y amplia apoyo na iniciativa nan deportivo. 

Ademas, e lo duna prioridad na e maneho, mantenimiento y modernisacion di e edificio y facilidadnan deportivo bou di responsabilidad di St. Fundacion Lotto pa Deporte. Enfasis lo wordo poni riba planificacion sostenibel, mantenimiento preventivo, inversionnan responsabel y uso eficiente di recursonan, pa garantisa facilidadnan safe, funcional y prepara pa futuro. 

William ta considera e legado y e impacto positivo pa e fundacion den desaroyo di deporte, sostene federacionnan y formacion di atleta como un di e motibonan principal pa acepta e funcion aki. Pa William, e posicion ta representa un oportunidad unico pa sigui contribui na Aruba, fortalece e legado di e fundacion y crea balor pa generacionnan presente y futuro. 

Mensahe personal di CEO William Erasmus

"Mi ta honra pa haya e oportunidad aki. Mi ta kere firmemente den e forsa di teamwork, experiencia y profesionalismo. Hunto cu e ekipo di St. Fundacion Lotto pa Deporte, nos lo sigui traha man den man cu tur stakeholdernan den e comunidad deportivo pa crea mas oportunidad, fortalece desaroyo deportivo y amplia e impacto positivo di deporte na Aruba. Mi compromiso ta pa sigui construi alianza nan fuerte, promove innovacion, transparencia y garantisa cu nos inversionnan den deporte lo continua beneficia atletanan, federacionnan y nos comunidad. Hunto nos lo sigui inverti den talento, inspiracion y orguyo nacional." 

Hunta di Supervision ta desea William Erasmus hopi exito den su funcion nobo y ta confia cu hunto cu e equipo di St. Fundacion Lotto pa Deporte y tur stakeholdernan, e lo sigui fortalece e mision di e fundacion y contribui na un futuro sostenibel pa deporte na Aruba. 

Hunta di Supervision kier a probecha e ocasion aki pa expresa su sincero gradicimento na Sr. Dominico "Junny" Figaroa pa su 4½ aña di servicio dedica como Director Interino di e fundacion. Durante su liderato, e fundacion a logra recupera financieramente,

reestableciendo un posicion financiero positivo y creando un base solido pa e futuro di e organisacion. Hunta di Supervision ta reconoce y aprecia profundamente su compromiso, perseverancia y e contribucion valioso cu el a haci na desaroyo di e fundacion y di deporte na Aruba. 

Hunta di Supervision ta desea Sr. Figaroa un pensioen bon mereci y ta gradicie pa su dedicacion y e legado positivo cu e ta laga atras.