Pa ahusta salario minimo lo mester introduci incentivonan pa empresanan

Hose Figaroa di FTA:

ORANJESTAD (AAN): Ya pa hopi tempo caba, Federacion di Trahadornan di Aruba (FTA) a vocifera e importancia pa ahusta salario minimo na nivel di e minimo di subsistencia (bestaansminimum). Asina señor Hose Figaroa di FTA a duna di conoce den un entrevista recien. El a splica cu for di tempo cu a introduci salario minimo, tin un gab di loke e salario minimo ta y e minimo di subsistencia. El a remarca cu pa logra e cambio aki, mester tene cuenta cu algun factor importante.

   Un efecto di aumenta e salario minimo ta cu comerciantenan por transmiti e aumento aki den e prijs di nan productonan, loke por haci cu e costo di bida tambe ta subi y, como consecuencia, automaticamente e bestaansminimum tambe lo subi.

   Señor Figaroa a remarca cu FTA a trata e tema aki na SER tambe na unda miembronan di SER tabata di acuerdo cu e pensamento. FTA a saca un conseho na Gobierno di Aruba na december aña pasa riba e tema aki pa drecha e salario minimo den direccion di e minimo di subsistencia. E conseho di FTA ta riba mesa ainda unda cu nan ta recomenda pa tuma medidanan, entre otro incentivanan fiscal na empresanan pa asina evita mas tanto posibel cu aumento di salario minimo wordo traduci den aumento den prijs di producto.

   Segun Figaroa, mester tene bon na cuenta tambe, cu na momento cu aumenta salario minimo, hopi biaha tin un grupo cu no ta wordo afecta, esta e clase media, cu ta gana salarionan mas halto cu salario minimo. Sinembargo, si prijs di producto wordo afecta como conscecuencia di aumento di salario, e clase media lo no haya un compensacion pa por paga e aumento riba prijsnan di producto. Pa e motibo aki, mester bin cu incentivanan pa comerciantenan acapara aumento di salario minimo den prijs, pa trece un balanse pa niun grupo keda atras.

   “FTA ta positivo cu e ahuste aki, pero e ahuste no por ta su so, e mester bin compaña cu incentivonan pa evita di haya situacionnan unda cierto grupo den comunidad ta keda atras”, señor Figaroa a conclui.