Raquel Lampe lo bira directora nobo di UNOCA

Entrante prome di september

ORANJESTAD (AAN): Union di Organisacionnan Cultural Arubano (UNOCA) lo tin un directora nobo. Raquel Lampe lo asumi oficialmente e cargo di directora di UNOCA for di 1 di september 2026.

E anuncio ta sigui despues cu UNOCA a celebra su 40 aniversario riba 25 di juni 2026, marcando cuatro decada di compromiso cu e promocion y desaroyo di cultura na Aruba. Riba 30 di juni 2026, hunta di directiva di UNOCA y personal di UNOCA y Scol di Arte a duna Raquel Lampe un bonbini oficial y a expresa nan miho deseo y exito den e reto nobo. Cu e nombramento aki, UNOCA ta mira cu confiansa pa sigui traha hunto cu e sector cultura y fortalece su apoyo na nos artistanan y organisacionnan cultural di Aruba.

Raquel Lampe ta un profesional cu hopi aña di experiencia den e sector educativo, cultura y desaroyo comunitario na Aruba. Actualmente e ta ocupa e cargo di directora di Filomena College MAVO, unda el a contribui significativamente na fortalecemento di enseñansa, innovacion y desaroyo di nos hobennan. Ademas di su trayectoria den educacion, Raquel Lampe ta ampliamente reconoci pa su compromiso cu arte y cultura Arubiano.

El a participa den diferente proyecto cultural, evento artistico y iniciativa comunitario, sirbiendo como maestra di ceremonia, coordinadora di proyecto y colaboradora di varios organisacion cultural. Cu un estilo di liderazgo basa riba comunicacion, colaboracion y innovacion, Raquel Lampe ta comprometi cu desaroyo di educacion, cultura y bienestar di nos comunidad. For di 1 di september, el lo continua e compromiso aki den su funcion nobo como directora di UNOCA.

Union di Organisacionnan Cultural Arubano (UNOCA) ta e organisacion encarga cu e maneho di e Fondo Cultural di Aruba. Desde su fundacion, UNOCA a hunga un rol importante den stimula desaroyo cultural, brinda apoyo financiero na proyecto y iniciativa cultural, y promove e crecemento di arte, patrimonio y creatividad riba nos isla.