Accident cu herido riba caminda di Santa Cruz

ORANJESTAD (AAN): Tabata Diamars anochi cu Central di Polis a dirigi patruya di Santa Cruz

pa bay riba caminda di Santa Cruz pa Playa, na altura di NAPA Auto Parts debi cu aki tin accident.

   Ora cu Polis a yega na e lugar di accident, nan a nota cu ta un dalmento entre un vehiculo Isuzu Pickup doublecab, y un auto compacto Suzuki Wagon R color blanco.

   Na momento cu a yega cerca, a bin nota cu un ocupante den e Suzuki Wagon R ta herida, y mester di yudansa medico.  Ambulans a yega y Paramediconan a atende mesora, pero a opta pa bay hibe pa Servicio di Emergencia na Hospital pa chekeo mas riguroso.

   A manda busca Specialista di Trafico di Polis na e lugar, y por a nota cu e impacto fuerte tabata den e porta banda drechi di e Suzuki, cu ta net unda e chauffeur ta sinta.

   Takelwagen tabata necesario pa move e Isuzu pickup mirando cu un wiel a kibra dilanti banda drechi.