Por haci transferencia via banco tambe pa yuda Cruz Cora

ORANJESTAD (AAN): Despues di dos temblor fuerte cu a dal Venezuela riba 24 di juni, miles di persona a keda afecta.

Casnan a wordo destrui, hospitalnan y scolnan a sufri daño serio, y hopi famia a perde tur loke nan tabatin. Tin areanan cu ainda ta sin awa, coriente y acceso na cuido medico.

   Pa por responde na e desaster, Federacion Internacional di Cruz Cora y Media Luna Cora (IFRC) a lansa un Yamado di Emergencia pa brinda asistencia na 300.000 persona den e lunanan cu ta bin.

   Cu bo donacion, Cruz Cora lo por ofrece: (*) Cuido medico di emergencia. (*) Refugio temporario. (*) Awa limpi y facilidadnan di hygiene. (*) Distribucion di articulonan esencial. (*) Apoyo psicosocial pa esnan afecta. (*) Proteccion y asistencia na e comunidadnan cu mas mester.

  Esaki ta un Yamado Internacional di Emergencia, unda donacionnan ta wordo coordina den e network di Cruz Cora pa yega na e personanan cu mas mester yudansa.

   Na Aruba, nos tambe por aporta cu un donacion na e Yamado di Emergencia aki via e cuenta di banco aki. Na e fase aki, ta ainda mucho trempan pa organiza of recohe donacion di paña, cuminda of otro articulonan. E tipo di yudansa aki por bira necesario den un fase mas despues, pero pa awor e prioridad ta riba asistencia di emergencia y apoyo financiero pa por atende e necesidadnan mas urgente. Si esaki cambia, Cruz Cora Aruba lo comunica esey na tempo.

   Nan cuenta ta Aruba Bank #0384010990 na nomber di “Red Cross Aruba-Venezuela Relief Fund”.

   Cada donacion ta conta. Cada acto di solidaridad ta haci un diferencia. Hunto pa Venezuela.