E propuesta pa un fusion entre HOH y ImSan a genera un debate necesario pa nos democracia

Parlamentario Hendrik Tevreden (MEP):

ORANJESTAD (AAN): Parlamentario Hendrik Tevreden ta reafirma su compromiso cu un di e temanan mas crucial pa nos comunidad: e futuro di cuido di salud na Aruba y e necesidad di sigui fortalece nos sistema medico. 

Recientemente, den su funcion como miembro di Comision Fiho di Salud, parlamentario Tevreden a bishita Instituto Medico San Nicolas (ImSan) pa asina observa di cerca e desaroyo cu e institucion a logra den ultimo añanan. 

Tevreden a destaca cu ImSan no ta simplemente un centro medico comun. E ta un institucion cu a logra algo cu hopi hospital den nos region ainda no a logra: e acreditacion prestigioso di Joint Commission International (JCI), considera mundialmente como e norma mas halto den calidad y siguridad di cuido di salud. Pa e parlamentario, e certificacion internacional aki no tabata un regalo ni un fabor politico, sino e resultado directo di añanan di trabou duro, liderazgo solido, inversionnan strategico y un compromiso profundo cu calidad. 

E bishita aki a haci e parlamentario reflexiona riba algun pregunta clave: 

• Awor cu ImSan a alcansa e nivel aki, ki pasonan mas por tuma pa fortalece su contribucion na nos sistema di salud?
• Tin bareranan administrativo y/of limitacion den financiamento?
• Tin decisionnan strategico cu AZV por tuma pa permiti ImSan amplia su servicio y yuda baha presion riba otro institucionnan? 

Fusion HOH-ImSan: echonan, retonan y e necesidad pa dialogo

E propuesta pa un fusion entre HOH y ImSan a genera un debate necesario pa nos democracia. Sinembargo, prome cu yega na cualkier conclusion, nos mester analisa e echonan y evalua e rendimento, exitonan y retonan actual di nos sistema di salud. Pa esaki, ta crucial pa conoce e vision di gobierno riba salubridad publico, tanto pa ImSan como pa HOH. 

A lo largo di añanan, pueblo di Aruba a inverti miyones di florin den nos hospital nacional. Sinembargo, regularmente ta surgi preocupacionnan tocante e costonan operacional, escasez di personal, listanan di espera, e presion financiero y e estado di e proyectonan cu ainda falta pa completa. Esaki no ta nifica cu cosnan ta bayendo malo, sino cu haci pregunta ta necesario pa busca mehoracion. Pa e motibo aki, Tevreden a presenta un serie di pregunta na e Minister di Salubridad Publico y a solicita formalmente pa e Comision Fiho di Salud organisa un encuentro awor cu directiva di HOH. E parlamentario a enfatisa cu e obhetivo no ta un bishita protocolario, sino un combersacion habri y transparente riba e reto- y oportunidadnan cu e hospital ta enfrenta. 

Conclusion

Transparencia ta un obligacion. E pueblo di Aruba tin derecho di sa con nos institucionnan di salud ta funciona, con recurso publico ta wordo inverti y cua ta e vision pa futuro. Tevreden a enfatisa cu e debate aki no ta un lucha entre HOH y ImSan, ni un competencia entre Oranjestad y San Nicolas. E enfoke mester ta riba un pregunta mucho mas importante: con nos por mehora y construi e miho sistema di salud pa Aruba? 

Si colaboracion, coordinacion of tecnologia ta necesario, laga nos uzanan. Pero tur decision mester ta basa riba evidencia, resultado y interes di e pashent, no riba emocion ni politica.

Na final, e pashent no ta interesa den ken ta gana un debate institucional. E pashent kier pa ora e of su famia tin mester di cuido, esaki ta accesibel, sigur, rapido y di calidad. Precisamente pa logra esey, mester tin un vision cla, sigui innova y sigui exigi transparencia di institutonan pa funciona riba e mihor manera pa nos cuidadanonan.