Prome grupo di hoben ta logra nan certificado di Programa Piskechi

Minister Geoffrey Wever:

ORANJESTAD(AAN): Ministerio di Finansa, Asuntonan Economico y Sector Primario Geoffrey Wever ta celebra e exito di e prome grupo di 10 hoben cu a completa e prome curso di Programa Piskechi, un iniciativa di Gobierno di Aruba cu ta inverti den e siguiente generacion di nos sector di pesca y fortalece e futuro di sector primario na Aruba. 

Durante e clausura di e prome curso di Programa Piskechi, e participantenan a ricibi nan certificado como reconocemento di nan experiencia nobo, facilita pa partner Oasis Fishing & More di senor Chito Rasmijn, un persona pasiona cu pesca y cu hopi expertisio. Programa Piskechi ta ofrece hoben entre 10 y 17 aña e oportunidad pa conoce di cerca e arte di pesca na man, y asina aumenta nan aprecio y participacion  den esaki. 

Minister Geoffrey Wever a felicita tur participante y a enfatisa cu inverti den e generacion nobo ta esencial pa sigui fortalece e capacidad y resiliencia di sector primario, pa e por sigui  crece y bira mas fuerte. 

“Nos sector primario ta fundamental pa Aruba su futuro. Door di involucra e generacion nobo na un edad jong den agricultura, pesca y otro actividadnan den e sector, nos ta preserva conocemento tradicional, stimula interes den e profesionnan aki y ta crea un fundeshi mas fuerte pa Aruba su  Sector Primario,” Minister Wever a expresa. 

“Mi ta gradici senor Chito Rasmijn cu su team pa ofrece e serie di curso aki na nos hobennan y juda nos pa sigui promove pesca bow di nos hubentud. Senor Chito Rasmijn a haci e curso na un forma hopi profesional, cu hopi dedicacion y pasenchi y mi ta sumamente agradecido na senor Chito Rasmijn y su team”, segun Minister Geoffrey Wever. 

E programa lo ripiti mensualmente, unda un weekend un grupo nobo di 10 hoben lo participa den e curso cu ta consisti di practica y teoria.Ainda tin algun cupo  pa mas hoben participa, via e link riba Facebook di Minister Wever. 

Programa Piskechi ta forma parti di e compromiso di Gabinete AVP-Futuro pa fortalece sector primario, promove seguridad alimentario y sigui inverti den desaroyo. Door di combina tradicion cu enseñansa practico, e programa ta contribui na forma e siguiente generacion di esnan cu ta stima e arte di pesca y tambe lidernan den sector primario di Aruba.