Roga Innate Foundation ta parti di e trayectoria di e atleta local Gregory Geerman

Diadomingo 20 di November Gregory ta participa na “Philadelphia Marathon”

ORANJESTAD (AAN):  Gregory ta un atleta local hopi conoci den e deporte di coremento na Aruba. Gregory a participa na diferente maraton rond di mundo manera Las Vegas (2017), Toronto (2018), Chicago (2019) y Amsterdam (2021).

            Na aña 2021, chiropractor Dr. Sandy Roga a lanta su propio fundacion bou di e nomber di Roga Innate Foundation. E fundacion di Dr. Roga tin como meta pa conscientisa comunidad cu nos salud ta den nos man. Roga Innate Foundation ta aporta na deporte y e salud di atleta y persona cu ta haci movecion.      Na comienso di 2022 e fundacion a haci su debut den e di 30 edicion di Ronde van Aruba cu “Innate Duo Runners”, representa pa Gregory Geerman y Yessyray Lopez.

            Duo Innate Runners a logra e meta di core 71.2 km den 5:59:39 y a sali prome luga den e categoria di Duo Mix.

            Diadomingo 20 di November Gregory ta participa na “Philadelphia Marathon”. E meta di Gregory ta pa core bou di 3 ora y 20 minute pa clasifica pa e maraton di Boston.

            Gregory su deseo di mas grandi como un coredo ta pa ta un arubiano mas cu ta bira un “Abbott World Marathon Majors six-star finisher”. E “Six Star Medal” ta un medaya cu ta wordo entrega ora cu completa seis (6) maraton, cual ta Chicago, Boston, New York, Berlin, London y Tokyo.

Roga Innate Foundation ta sostene Gregory den logra su metanan como coredor local y ta admire como persona pa su humildad y pa su compromiso, pasion y disiplina cu e ta demostra tur dia pa su deporte.

            Roga Innate Foundation ta desea Gregory tur clase di exito na Philadelphia!