Digna Geerman ta dispidi como boluntario riba tereno di Adiccion y Social

Despues di 50 aña di trabao incansable:

ORANJESTAD (AAN)-- En conexion cu Dia Internacional di Lucha Contra Adiccion, cu ta awe, Diahuebs 26 di Juni, DIARIO a acerca señora Digna  Geerman, kende despues di mas cu 50 aña di traha como boluntario riba tereno di adiccion y social, guiando un cantidad grandi di hoben y adulto, cu a cay den adiccion, y hopi di nan a logra rehabilita danki na e trabao incondicional y amor di Digna.

   Den e entrevista cu Digna Geerman, el a expresa: “Despues di mas di 50 aña awe mi ta tuma despedida. Cu un danki hopi grandi na Hesus, pa tanto misericordia ricibi durante momento y lugarnan peligroso.
Danki na tur cu di un manera of otro mi por a duna mi ayudo cu amor incondicional, y tambe na tur cu na diferente manera a sostene mi y tabata cu mi. Mi no kier menciona ningun nomber pa no lubida ningun, Dios si sa ken nan ta.

   E despedida aki ta cu hopi tristeza, sperando cu lo bin un solucion y un final”, Digna Geerman a conclui.