Ora cu nos no ta mantene, Pueblo ta paga dos biaha

Parlamentario Stephany Sevinger:

ORANJESTAD (AAN): Durante e tratamento di e propuesta di ley pa establece e Aruba Infrastructuur- en Ontwikkelingsfonds (AIOF), parlamentario di AVP Stephany Sevinger a enfatisa cu Aruba a yega na un punto decisivo den su desaroyo, unda gobierno mester pensa mas cu solamente e presupuesto di un aña y cuminsa traha cu un vision di largo plazo.

Segun Sevinger, e debate tocante AIOF no ta simplemente tocante un fondo financiero, sino tocante e direccion cu Aruba kier tuma den e siguiente decada. “Nos no por sigui goberna Aruba solamente pa sobrevivi di aña pa aña. Nos mester goberna Aruba pa prospera,” el a declara.

E parlamentario a señala cu durante añanan consecutivo Aruba a identifica metanan manera diversificacion economico, construccion di casnan, fortalecemento di infrastructura, sostenibilidad y digitalisacion. Sin embargo, tur e prioridadnan aki tin un elemento comun: nan ta rekeri inversion consistente, strategico y planifica pa largo plazo.

Sevinger a reconoce cu transparencia, supervision y dunament’i cuenta ta fundamental pa cualkier inversion cu ta wordo haci cu placa publico. El a expresa apoyo pa fortalecemento di supervision, uso di KPI’s y miho dunament’i cuenta, pero a adverti cu falta di perfeccion no por bira un excuus pa paralisa accion y desaroyo.

“Na algun momento nos mester converti control, supervision y planificacion den resultado concreto. E pueblo ta spera progreso y solucionnan,” Sevinger a expresa.

Den su discurso, el a recorda diferente inversionnan grandi cu a transforma Aruba den pasado, incluyendo infrastructura vial, expansion di facilidadnan publico, scolnan y otro proyectonan cu ainda awe comunidad ta beneficia di nan. Segun Sevinger, debate politico por existi tocante procedimento y implementacion, pero e resultado tangibel di e inversionnan aki no por wordo nenga.

Na mes tempo, Sevinger a pone enfasis riba un punto cu segun dje no ta haya suficiente atencion: mantencion. El a señala cu hopi inversionnan realiza den pasado no a ricibi e mantencion necesario durante añanan subsecuente.

“Ora cu nos no ta mantene, pueblo ta paga dos biaha. Un biaha pa construi y un biaha mas pa repara loke no a wordo cuida,” Sevinger a declara.

P’esey el a solicita aclaracion di gobierno tocante con AIOF lo incorpora mantencion como un componente integral di cada inversion, garantisando cu proyectonan di awe no bira gastonan adicional pa generacionnan futuro.

Sevinger tambe a rechasa e idea cu inversion den infrastructura no ta inversion den hende. Segun el, camindanan mehor, scolnan moderno, infrastructura digital y un suministro confiabel di energia tin un impacto directo riba calidad di bida di pueblo. El a agrega cu gobierno actual a demostra cu ta posibel inverti tanto den infrastructura como den bienestar social, mencionando aumento den AOV, bijstand, schoolkindertoeslag y diferente medida pa proteha poder di compra.

Pa conclui, Sevinger a enfatisa cu e decision cu Parlamento ta tuma awe lo determina si Aruba ta sigui reacciona na problema nan despues cu nan presenta, of si e pais ta crea e fundeshi necesario pa prepara su mes pa futuro.

“E debate di awe no ta simplemente tocante un fondo. E debate di awe ta tocante si nos kier un Aruba cu ta reacciona na problemanan, of un Aruba cu ta prepara pa futuro. Mi ta scoge pa nos porvenir,” Sevinger a conclui.