Parlamento a vota y awor Fondo di Inversion a bira realidad

Minister Geoffrey Wever:

• Ley di AIOF ta bay financia inversionnan publico
• Dos Ministro ta bay maneha e Fondo 

ORANJESTAD (AAN):  Promer Minister Mike Eman y Minister di Finansa, Asunto Economico y Sector Primario Geoffrey Wever ta informa cu Gabinete AVP-Futuro, cu aprobacion di 11 parlamentario ta crea Aruba su Fondo di Inversion “Algemeen Investerings en Ontwikkelingsfonds” (AIOF). Meta di AIOF ta financia inversionnan publico na bienestar di Aruba. E fondonan pa ehecucion di inversionnan ta bini di Presupuesto di Pais Aruba y tambe por ricibi contribucionnan di tercer partidonan manera Hulanda y Union Europeo. Cu creaccion di AIOF, Aruba awor ta dispone di un un instrumento financiero mara na un Agenda di Inversion pa ehecucion di inversionnan a largo plaso.

   Creacion di AIOF ta un proceso legal. Articulo 38 inciso uno di Comptabiliteitsverordening ta e base huridico pa crea un “begrotingsfonds” cu su reglanan pa garantisa rendicion di cuenta tocante e maneho financiero y e gastonan. Cu creaccion di un fondo di inversion Gabinete AVP-Futuro ta cumpli cu prioridad di maneho number 5 manera indica riba pagina 4 di Programa di Gobernacion AVP- Futuro 2025- 2028.

   Awor cu un fondo di inversion, Gabinete AVP-Futuro ta facilita y structura inversionnan a largo plaso y riba  areanan di maneho manera renobacion urbano, enseñanza, transicion di energia, resiliencia climatico, vivienda duradero, infrastructura y crea sectornan economico nobo manera agricultura comercial, FINTECH, industria creativo y economia blauw.

   Maneho di AIOF lo cay bao responsabilidad di minister di Asuntonan General y minister di Finansa. E fondo di inversion lo tin su propio presupuesto aparta cu ta contene e obligacionnan financiero, gastonan y entradanan.  E presupuesto di e fondo di inversion lo wordo agrega como un parti separa den e Presupuesto di Pais Aruba. Pa rendicion di cuenta riba ehecucion di e Fondo, su “jaarrekening” lo wordo consolida cu esun di Pais Aruba. Administracion di fondo di inversion lo cay bao di directeur di Departamento di Finansa pa haci pagonan den cuadro di ehecucion di inversionnan via e Fondo. Control riba e administracion di e fondo ta wordo haci pa Centrale Accountantsdient. Cada mitar di aña e minister di Finansa mester entrega un resumen di e entradanan y gastonan realisa di e Fondo di Inversion. CAft lo ricibi un copia di e resumen aki.

   Inversionnan di AIOF ta forma parti di un agenda di inversion multianual. E Agenda di Inversion ta encera inversionnan riba areanan di maneho manera renobacion urbano, enseñanza, transicion di energia, resiliencia climatico,  vivienda duradero, infrastructura y crea sectornan economico nobo manera agricultura comercial, FINTECH, industria creativo y economia blauw.

   Awor cu un fondo di inversion, un structura central a base di financiamento y un agenda di inversion, cada minister por entrega proyectonan di inversionnan. E proyectonan aki lo wordo evalua pa e Comision di Evaluacion di Inversionnan cu ya desde 2022 ta encarga cu evaluacion di proyectonan di inversionnan di Pais Aruba.

  Na final di e evaluacion, e Comision di Evaluacion di Inversionnan lo duna conseho na gobierno riba proyectonan di inversion, riba alocacion di e fondonan disponibel pa e agenda di inversion y con e proyectonan di inversion ta alinea entre otro cu maneho di gobierno, efectividad, sostenibilidad, si proposionnan ta ehecutabel, direccion y control. E Comision di Evaluacion di Inversionnan por pidi tambe contribucion di otro expertonan pa ehecucion di su tareanan.

   Via un “ministriële regeling” ta stipula reglanan adicional pa ehecucion independiente, e  manera di duna cuenta di su tarea y e marco di criterianan pa “Investeringsevaluatiecommissie” evalua e proyectonan di inversion. E Comision di Evaluacion di Inversionnan mester entrega no mas tarda cu dia 1 di april di cada aña un resumen di e trabaonan ehecuta. E resumen aki mester contene e proyectonan di inversionnan aproba pa cual ta destina e fondonan, cambio den e fondonan y gastonan cu a wordo destina na e proyectonan di inversion y e resultadonan di e proyectonan di inversionnan aproba.

   E ley pa creaccion di e AIOF ta dicta cu despues di 5 aña cu esaki drenta na vigor, e minister di Finansa ta nombra un comision di por lo menos 4 persona cu conocemento di e materia. E comision tin e tarea di entrega un rapport di evaluacion di e  efectividad y efectonan di ehecucion di e “Landsverordening Algemeen Investerings en Ontwikkelingsfonds”.  Minister di Finansa tin e tarea ancra den e ley pa haci entrega oficial di e rapport aki na Parlamento di Aruba y College Aruba financieel toezicht. Tambe e ley ta prescribi pa publica e raport di evaluacion riba gobierno su website.

   Despues di un trayecto huridico, Gabinete AVP-Futuro ta realisa Aruba su fondo di inversion pa garantisa na un manera structural ehecucion di inversionnan di gobierno na bienestar di Aruba. E ley ta garantisa den cada stap e rol constitucional di Parlamento di Aruba, desde aprobacion di e fondonan publico den e Fondo di Inversion te ricibi dos biaha pa aña un resumen di e entradanan y gastonan realisa di e Fondo di Inversion y despues di 1 aña e rapport di evaluacion di e  efectividad y efectonan di ehecucion di e “Landsverordening Algemeen Investerings en Ontwikkelingsfonds”.

    Cu esaki Gabinete AVP-Futuro  banda di cumpli cu prioridad di maneho number 5 manera indica riba pagina 4 di Programa di Gobernacion AVP- Futuro 2025- 2028 tambe ta crea un instrumento financiero duradero pa ehecucion di inversionnan di gobierno awo y den futuro segun Minister Geoffrey Wever.