Desde 1 di juni, Polis no ta haya bon di cuminda mas pa overtime planea

Francel Bernardus, vicepresidente di Sindicato SPA:

ORANJESTAD (AAN) – Actualmente tin un situacion di descontento entre polisnan tocante e bonnan di cuminda durante trabou di overtime. Esaki a wordo confirma door di señor Francel Bernardus, vicepresidente di Sindicato di Polis Aruba (SPA), den un declaracion na DIARIO. 

Bernardus a splica cu overtime no ta algo cu polisnan ta scoge boluntariamente pa aumenta nan entrada, sino cu ta un necesidad operacional cu ta surgi ora e trabou asina ta exigi.

El a indica cu esaki ta pasa regularmente den Departamento di Recherche (DAR), unda investigacionnan no semper por wordo interumpi na final di un dia laboral pa wordo continua posteriormente. Situacionnan similar ta presenta tambe den Straatdienst, na unda cu polisnan no por stop di traha zomaar te siguiente dia planea di trabou. Y tambe ausencia pa motibo di enfermedad regularmente ta obliga otro polisnan cubri shift adicional.

Segun Bernardus, e legislacion actual ta establece cu ora overtime ta planifica anticipadamente, no tin derecho riba bon di cuminda. Sin embargo, den caso di overtime inespera, e beneficio aki si ta aplica. El a argumenta cu, den practica, polisnan cu ta traha overtime – sea planifica of inespera – frecuentemente ta obliga di haci dobbel shift y no semper tin oportunidad pa prepara cuminda adecuadamente. 

E vicepresidente di SPA a recorda cu na aña 2020, despues di consulta entre e minister di Husticia e tempo ey, señor Andin Bikker, ex-Alto Comisario Vanessa Kock y e ex-presidente di SPA, Joselito Dirksz, a yega na un acuerdo pa garantisa bon di cuminda durante overtime, sin distingui entre overtime planifica of inespera. 

No obstante, na principio di e luna aki, SPA a ricibi un email informando cu, entrante 1 di juni, polisnan lo no haya bon di cuminda mas durante overtime cu a wordo planifica anticipadamente. Segun Bernardus, e decision aki a provoca considerable preocupacion y descontento entre e miembronan. 

“Esaki ta un asunto cu ta afecta directamente nos miembronan, kende regularmente ta sacrifica tempo cu famia y nan bida social pa cumpli cu nan debernan professional den oranan extra. Aworaki nan ta perde e beneficio aki tambe, cu ta nan derecho adkiri y aproba desde 2020. Sindicato SPA lo continua dialoga cu e autoridadnan competente pa busca un solucion y proteha e derechonan di su miembronan,” Bernardus a enfatisa.