Caso penal contra ex-miembro di Wardacosta posponi

E ta wordo acusa di varios delito

ORANJESTAD (AAN): Den Corte di Husticia, y riba peticion di abogado mr. Carlo, Hues a pospone tratamento di e caso penal cu Ministerio Publico a cuminsa contra e homber E.J.F. di 33 aña, kende ta wordo acusa di diferente delito cu el a haci como miembro di Wardacosta.

   Acusacionnan: Ta asina cu acusado E.J.F. no a presenta den Corte. Abogado mr. Carlo a bisa Hues cu debi cu su cliente E.J.F. no ta di acuerdo cu a cuminsa un caso penal, e no a presenta pero lo bay ta presenta ora di tratamento di e caso.

   Fiscal a bisa cu e acusacionnan contra E.J.F. ta: (*) Cu riba 13 Maart 2023, hunto cu otronan a horta un motor di boto, usando su poder of oportunidad como miembro di Wardacosta. (*) Tambe Fiscal ta acusa E.J.F. di encubrimento di flares y balanan entre 4 te 11 Maart 2023. (*) Acusado E.J.F. ta wordo acusa di a mata of a herida un cantidad di calco, siendo animalnan proteho pa ley. (*) E ta wordo acusa di a pone otronan (door di regalonan, promesanan, mal uso di autoridad, violencia, menaza of estafa of door di duna nan oportunidad/informacion) a mata of herida calconan entre Augustus 2023. A duna intencionalmente informacionnan tocante pikimento di calco den awanan teritorial di Aruba y paga of haci palabracionnan tocante compra/pago di calco.

   Abogado a pidi pa pospone caso: Hues a bisa cu e intension tabata pa trata e caso pero abogado mr. Carlo a haci un peticion pa pospone e caso, debi cu el a haya hopi laat e documentonan di e caso. Hues e ora ey a pensa pa haci e tratamento un forma caminda abogado por haci peticion si e kier pa haci cierto investigacion.

   Abogado a bisa Hues cu ta imposibel pa e haci peticion pasobra e no a haya chens di studia e caso cu su cliente. El a bisa Hues cu na December 2025 tabatin Tomzitting, caminda E.J.F. a nenga di accepta castigo pasobra cu e no ta haya cu e ta culpabel y Fiscal a laga sa cu lo bin un caso penal.

   E abogado a bisa Hues cu el a pidi Fiscal diferente biaha pa haya documentonan di e caso. Awor, el a haya e documentonan laat y no a haya chens prepara e caso. Riba pregunta di Hues, abogado mr. Carlo a bisa cu e ta kere cu pa fin di Juni 2026, e lo manda su peticionnan pa tanto Fiscal como Hues. E abogado a splica cu e lo ta cla e ora ey di a consulta y studia e caso cu su cliente.

   Abogado mr. Carlo a bisa Hues cu henter e caso ta basa riba tap di su cliente. E ta haya kico tabata e motibo cu a tap su cliente. Tambe el a mustra cu tin diferente testigonan cu e kier lesa nan declaracion promer cu e bay haci peticionnan.

   Hues a bay di acuerdo y fiha un otro regie-zitting pa 6 Augustus 2026.