Gobierno mester debolbe tur E-Steps y E-Bikes na companianan

Hues a bati riba dede di Minister Dowers pa cu e forma di actua

ORANJESTAD (AAN): Diabierna mainta Hues di Corte di Husticia den Promer Instancia a dicta sentencia den e caso sumario cu e companianan di huur step electronico den e sector hotelero: E-Bike y Green Bike a cuminsa contra Gobierno. Esaki ta relaciona cu e decision di Minister di Husticia pa kita tur E-Steps y E-Bikes for di caminda ya cu esakinan ta forma un peliger pa trafico y esnan cu ta riba e steps y mopednan aki.

   Sentencia: Hues den su sentencia ta mustra cu dia 21 di April 2026, e Minister di Husticia a anuncia cu, di  inmediato, ta prohibi pa uza e E-Steps y E-Bikes electrico riba caminda publico. Riba 29 di April 2026, un “Ultimo Aviso” di e Minister a wordo publica riba social media y riba 30 di April 2026, Gobierno a manda kita e Stepnan electrico.

   E companianan E-Bike y Green Bike den Corte a pidi Hues pa prohibi Gobierno confisca e stepnan electronico.

   Gobierno no ta di acuerdo cu esey y a presenta un contra demanda caminda ta pidi pa e companianan kita tur e stepnan electronico y e stacionnan di carga for di propiedadnan di Gobierno.

    No por kita E-Steps: Hues su decision den e caso sumario aki ta cu, na e momento aki, Gobierno no por kita e stepnan electronico.

   Hues a mustra cu si Gobierno kier tuma medida contra e Stepnan electrico, esey mester sosode cuidadosamente y segun e forma stipula den ley. Den e caso aki, esey ta nifica cu Gobierno mester manda un carta na e companianan, unda Gobierno ta anuncia cu (y di con) segun Gobierno e companianan ta actuando contra ley. Gobierno mester specifica di cual ley ta trata, cual medidanan e companianan mester tuma. Ademas Gobierno mester stipula un periodo cu e companianan mester haci esey.

   Hues a remarca cu Gobierno no a haci nada di esey den e caso aki.

  E-Steps y Chargers ta keda: Hues a sigui bisa cu Corte ta dicidi cu e companianan di huur e stepnan electronico, na e momento aki no ta obliga pa kita e Stepnan y e stacionnan di carga for di caminda publico.

   Hues ta mustra cu aki tambe ta conta cu Gobierno mester prome manda un carta na e companianan cu e peticion pa nan kita nan propiedadnan for di tereno di Gobierno y esaki dentro di un tempo razonabel.

   Companianan y reglanan: Hues ta mustra cu e decision aki no ta nifica cu e E-Steps por keda pa semper riba caminda publico.

   Hues ta mustra cu naturalmente e companianan cu ta huur e stepnan electrico, mester atene nan mes na e reglanan vigente. Esey ta conta tambe pa e manehador di tur E-Steps.

    No por actua si no a sigui reglanan di ley! Hues ta mustra cu e sentencia ta nifica cu Gobierno no por yega actua, kita Steps electrico, mientras cu Gobierno mes no ta sigui e reglanan stipula den ley.