Minister Wendrick Cicilia a firma e prome ‘Zona di Desperdicio’ permanente na Barcadera

Turismo ta reinverti den un Aruba mas limpi

ORANJESTAD (AAN): Minister di Turismo, Transporte y Labor, mr. Wendrick Cicilia, hunto cu partnernan strategico, a presenta oficialmente e prome Zona di Desperdicio permanente na Barcadera, un iniciativa cu ta marca un paso importante den direccion di un Aruba mas limpi, structura y sostenibel.

   Durante conferencia di prensa, Minister Cicilia a comparti cu e proyecto ta forma parti di un vision mas amplio pa reinverti e exito di turismo den mehoracion concreto pa nos comunidad y medio ambiente. A traves di colaboracion cu Aruba Tourism Authority (A.T.A.), a dirigi e fondonan di turismo pa atende reto structural cu ta impacta directamente nos calidad di bida.

   E iniciativa ta financia pa medio di A.T.A., asina continuando y sigurando cu entrada genera door di turismo ta wordo reinverti directamente tambe den proyectonan cu ta beneficia tanto comunidad como medio ambiente.

   “Turismo no por ta solamente tocante cantidad di bishitante. E mester trece beneficio real pa nos pueblo. Ora nos reinverti den un Aruba mas limpi y organiza, nos ta inverti den calidad di bida, den orguyo nacional y den e experiencia cu nos bishitantenan ta biba”, asina Minister Wendrick Cicilia a expresa. 

   “Cu Aruba Limpi, nos no ta solamente crea conscientisacion pero nos ta  realmente facilita cambio di comportacion tambe. E introduccion di Zona di Desperdicio na Barcadera ta duna nos comunidad acceso practico pa contribui na un isla mas limpi. Pa A.T.A., un medio ambiente limpi no ta solamente importante pa nos imagen como destinacion, pero e ta un inversion directo den sostenibilidad di nos producto turistico y bienestar di nos comunidad. Un Aruba limpi ta un responsabilidad comparti y hunto nos por sigura cu nos isla ta keda atractivo y resiliente pa futuro," asina Ronella Croes, CEO di A.T.A., a expresa durante e firmamento di e acuerdo.

   Un isla limpi ta clave pa un turismo fuerte: Minister Cicilia a enfatisa cu limpiesa di Aruba no ta solamente un tema ambiental, sino tambe un factor economico importante. Relatonan di A.T.A. ta indica consistentemente cu limpiesa di e isla ta entre e top 5 motibonan pakico e bishitantenan ta expresa satisfaccion y ta scoge pa bolbe Aruba.

    Den e contexto ey, Minister Wendrick Cicilia a aclara cu e rol di e Zona di Desperdicio ta estrictamente enfoca riba centralisacion y organizacion di sushi, mientras cu e procesamento final y politica nacional di afval ta continua den responsabilidad di Ministerio di Energia.

   E localidad permanente na Barcadera ta brinda un punto central pa recoleccion di sushi di cas y otro material grandi, asina tambe sushi di hardin, facilitando un sistema mas structural y eficiente.

    Segun Minister Cicilia, e continuacion di proyecto piloto di “Baki den Bario” di Minister di Naturalesa, na final di 2025, a sirbi como un paso importante, pero a mustra tambe e necesidad pa un solucion mas permanente y sostenibel.

    Cu e modelo nobo, e residentenan no mester depende di un calender specifico of spera te un baki yega den nan bario pa por deshaci di sushi. Ademas, e sistema ta busca elimina situacionnan unda sushi ta keda atras den comunidad despues di recoleccion y evita filanan largo cu hopi biaha tabata representa un frustracion p’e ciudadanonan. Di e manera ‘ki, famianan tin mas flexibilidad y comodidad pa deshaci di nan sushi den un manera mas accesibel.

    Evaluacion structural y vision pa futuro: Durante e conferencia di prensa, Minister Cicilia tambe a anuncia cu Gobierno lo conduci un evaluacion structural despues di seis luna di operacion. E analisis aki lo sirbi pa evalua patronchinan di uzo, impacto riba comunidad y e necesidad pa expansion of adaptacion di e servicio.

   Segun Minister Cicilia, e expectativa ta cu uzo inicialmente lo ta relativamente halto, pero eventualmente lo stabilisa conforme comunidad adapta y e barionan bira mas limpi. Basa riba e resultadonan, Gobierno lo reuni cu tur stakeholder envolvi pa evalua e siguiente pasonan y e sostenibilidad financiero di e iniciativa.

   Como parti di un vision pa largo plaso, tambe ta explora e posibilidad pa evoluciona pa un concepto completo di “Milieustraat,” unda residentenan por registra nan uzo y crea un sistema mas eficiente pa maneho di diferente tipo di sushi.

    Minister Cicilia a expresa gradecimento na tur partnernan cu a contribui pa haci e iniciativa posibel, incluyendo A.T.A., Ecotech, Ministerio di Energia y demas stakeholdernan clave.
    Particularmente, a enfatisa e importancia di concientisacion publico como parti esencial di exito di e proyecto, señalando cu infrastructura solamente no ta suficiente sin un cambio den comportamiento colectivo. “Un Aruba limpi ta responsabilidad di tur hende. Gobierno por crea infrastructura y oportunidad, pero exito di berdad ta ora comunidad y gobierno ta traha hunto pa cuida nos isla”, Minister Wendrick Cicilia a finalisa bisando.