Aumento di costo di bida ta haci cu pa atende e peticion e tempo ta bira mas largo

Gianaika van der Biezen, director di FPNC

• Awo por extende te seis luna mes 

ORANJESTAD (AAN): Gianaika van der Biezen, director di Fundacion pa nos comunidad (FPNC), den un entrevista cu DIARIO, a reitera cu e fundacion ta purba di yuda tur e famianan cu ta acerca na dje, sea directamente of via tur e otro organizacionnan cu FPNC ta traha cu nan, y enberdad e costo di bida a subi y e clientenan ta acerca e fundacion mas biaha, y pa atende e peticion ta bira un poco mas largo; na lugar di extende no di dos pa tres luna, sino tin biaha pa mas largo cu seis luna mes.

   “Enberdad esaki ta un tiki preocupante y pa cu esaki nos ta trahando conhuntamente cu diferente organizacion, pa wak kico y con nos ta yuda e famianan aki pa wak con nan por para riba nan pia. Tin diferente proyecto, un di nan ta Journey to succes, unda nos ta wak clientenan cu por ehemplo a cuminza cu un ayudo chikito, un par di trabao, tayer di trabao y por ta un tiki mas.

   E pakete so, cu nos ta brinda na nos clientenan cu ta e pakete di cuminda y  higiene, y tambe den articulonan di cas, paña, tambe nos tin proyectonan cu ta bay bin cu ta bon pa menciona. Manera ‘Back to School’, cu tin mayornan cu ta preocupa pa e muchanan cu ta bay cuminza scol nobo, y tambe e aña escolar nobo, ya nos ta bezig tambe cu esey. Y tambe pa purba duna nan e sosten cu nan mester. Y den esey nos ta wak cu e periodo ta bira un tiki mas largo cu nos ta brinda ayudo”, Gianaika van der Biezen a reitera.

   E tipo di famia cu e fundacion ta yuda ta mixto. Tanto esnan cu no tin ningun fuente di entrada y esnan cu tin un entrada cu no ta yega.

   Gianaika a splica cu tur famia cu ta corto den cuminda e Fundacion ta brinda un ayudo. “Pasobra por ta un famia cu ta traha pero e entrada no ta yega, no ta alcanza pa tin tur cos den cas. Nos ta yuda suaviza, alivia un parti di e problema den cas”, Van der Biezen a señala.