Minister Geoffrey Wever a firma di un MoU pa establece e Caribbean Special Economic Zone Association

*Cu meta pa fortalece cooperacion entre Special Economic Zones den Caribe

ORANJESTAD (AAN): Durante participacion na e World Free Zone Conference na Panama City, Minister di Finansa, Asunto Economico y Sector Primario, Geoffrey Wever, hunto cu e Director di Free Zone Aruba, Sr. Walter Mosher, a tuma parti activamente den varios dialogo strategico na nivel regional y internacional, cu foco riba innovacion, sostenibilidad y fortificacion di e posicion competitivo di Free Zone Aruba den e region. 

E participacion di Aruba den e conferencia aki ta forma parti di e trayectoria mas amplio pa modernisa nos Free Zone. Gobierno a traha duro pa restructura Free Zone Aruba y ta keda activamente traha conhuntamente cu directiva di Free Zone, pa sigui transforma e modelo actual di un sistema tradicional,  un hub di conocimiento, innovacion y balor agrega, cu ta contribui na e desaroyo di e economia global moderno. 

Durante e conferencia, Minister Wever a participa den tres round table importante. E participacion den e round table nan a enfoca riba e retonan y oportunidadnan clave pa e region, incluyendo diversificacion economico, fortalecemento di capacidad y adaptacion na e mercado global manera digitalisacion y ‘nearshoring’. Sostenibilidad, bon gobernanacion y atraccion di inversion tabata elemento central den e dialogo. 

E temanan discuti durante e round table nan ta alinea directamente cu e direccion strategico di Aruba, unda digitalisacion, sostenibilidad y bon gobernashon ta forma e base pa e renovacion di nos Free Zone y su posicion como un plataforma moderno pa inversion y comercio pa Aruba. 

Ademas, durante e bishita, a tene varios reunion bilateral cu oficialnan di alto nivel manera lidernan di free zone, inversionistanan y experto den industria for di varios paisnan incluyendo Emiratonan Arabe Uni, Jamaica, Barbados, Curaçao, Panama, Republica Dominicana, Merca, Brazil, y varios otro islanan. E reunionnan aki a crea espacio pa intercambio di experiencia, conocimiento y exploracion di colaboracion futuro, cu enfoque riba con Aruba por sigui fortalece su modelo di Free Zone. 

Un resultado importante di e conferencia tabata firma di un “Memorandum of Understanding” (MOU) pa establece e Caribbean Special Economic Zone Association (Cari-SEZA), un plataforma regional cu tin como meta fortalece cooperacion entre Special Economic Zones (SEZs) den Caribe. 

E iniciativa aki ta refleha un compromiso comun pa aumenta competitividad global di e region, atrae mas inversion, y integra e Caribe mas profundamente den sistemanan internacional di comercio y logistica. 

E desaroyo aki ta conecta cu e ambicion di Aruba pa posiciona su Free Zone no solamente como un lugar di actividad comercial, pero como un ecosistema completo unda conocimiento, innovacion y colaboracion ta central. 

Un framework interino lo guia e siguiente fase di implementacion, incluyendo formacion di un steering committee pa supervision di gobernacion, operacion y coordinacion regional. E asociacion lo sirbi como un bos unifica pa SEZnan den Caribe y lo contribui na posiciona e region como un destino mas atractivo pa inversion global. 

“Participacion di Aruba den e tipo di plataforma internacional ta esencial pa nos sigui fortalece y desaroya  nos modelo di Free Zone, amplia nos colaboracion y posiciona Aruba como un hub di conocimiento, innovacion y inversion den region,”  Minister Wever a declara.