Premier Jetten a keda impresiona cu e talentoso hobennan di Aruba

Durante Sport Expo na Santa Cruz

ORANJESTAD (AAN): Premier Rob Jetten di Hulanda, riba Diaranson a bay haci bishita na Centro Deportivo Betico Croes na Santa Cruz, na e Sport Expo unda hopi mucha cu a bira campeon durante Schoolsport di Aruba.  Tambe tin e campeonnan cu a representa e isla durante Weganan Interinsular di Aruba, Bonaire, y Curacao.

   E biaha aki den Weganan Interinsular tabata basta importante pa e islanan, cordando cu e concepto di ‘Weganan Interinsular’ tabata basa riba acuerdo di e tres islanan unda cooperacion ta enfoca riba deportivismo.  Pero e biaha aki hasta Islanan Ariba y Suriname a participa como invitado special den weganan Interinsular cu a ser teni e biaha aki na Bonaire.  E hobennan a demostra loke nan por logra ora di competi fuertemente.

   E presencia di Premier Jetten nifica hopi pa e hobennan, pa mustra cu deporte, desaroyo hubenil y cooperacion dentro di Reino ta hopi importante.

   Premier Jetten a participa como apoyador activo durante diferente competencia teni e mainta aki.

   Den su discurso, Jetten a felicita tur hoben cu nan fenomenal prestacion pa gana asina hopi medaya.  El a sinti leuk di participa, pasobra e mes henter su bida a practica deporte, y e ta considera esaki como un forma unico pa hobennan cosecha talento, topa mas hende, y asina hunto fomenta mas amistad.

   Ademas di esey, den e mundo moderno aki pa bo curpa keda den bon salud ta importante pa practica deporte y movimento lo bay keda esencial pa e ser humano.  Premier Jetten a gradici pa e organizacion di e mainta di Sport Expo, y recepcion di dje na Centro Deportivo Betico Croes.

   E mainta aki un total di 150 mucha di 16 diferente scol (di kleuter te cu scol secundario) tabata presente na e Sport Expo aki.  Nan tin yen di energia, team spirit, y talento.