Rijnan birando hopi largo pa por haci test di Covid-19 na Miami

Arubianonan a keda casi 3 ora y mey den fila

ORANJESTAD (AAN): Den fin di siman, DIARIO a haya sa di un famia cu a mira cu nan propio wowo, con hopi hende ta birando malo na Florida y ta haya nan obliga di bay para den rij largo cu a dura nan como 3 ora y mey, prome cu a yega na haci un PCR Test pa check pa Covid-19.

   Aki bo tin di sinta den auto, y core pasa door di rij traha riba varios parkinglot, despues subi caminda bek, y bolbe drenta den parkinglot, te ora bo yega na turno.  Nan a dura como 3 ora y mey, pero e test mes a wordo haci den menos di 30 seconde.

   Y como cu bo ta den auto, bo por mira con hendenan sinta den nan vehiculo ta tosa, ta mustra di ta malo, y kedando den nan vehiculo cu bentana cera, ta warda cu nan pasenshi te ora cu nan wordo atendi pa haci test.

   E Arubianonan a indica cu nan a bay haci test pa viahamento, pues nan no ta malo.  Pero e experiencia di keda draai rond den parkinglot, a pone nan corda ora cu nan ta para den fila na Magic Kingdom na Walt Disney World.

   E rijnan tabata sigui bira mas largo cada dia, indicando cu e cantidad di hende cu ta birando malo cu Covid-19 na Florida ta sigui crece.  Esaki a wordo empeora door di e riesgo halto di contagio causa pa e variante di Omicron.

   Y ta cada area di test na Florida ta yen-yen di auto.  Pues bo tin di scucha noticia na radio pa purba haya sa, ta cual di nan ta menos druk y trata na yega eynan na tempo prome cu otro autonan tambe a bin para prome cu bo.