Gobierno a ricibi 31 miyon Florin na impuesto di vehiculo

Parlamentario Eduard Pieters di PPA:

• Un suma cu lo mester a bay DOW pa drecha caminda 

ORANJESTAD (AAN): Eduard Pieters, lider di Partido Patriotico Arubano (PPA), den entrevista cu Matutino DIARIO a duna di  conoce cu diaranzon di e siman aki, Parlamento a trata e presupuesto di DOW.

   El a señala cu DOW ta un departamento di gobierno cu ta duna hopi servicio, y tin diferente area cu por wordo trata, y esun primordial ta Aruba su careteranan.

   El a relata cu aki por trece dilanti cosnan hopi simpel. Por ehemplo si nos tin 90 mil auto ta core riba caminda, tumando esaki literal, aunke e ta kere cu tin mas, si tur hende ta paga 350 Florin average na impuesto, ta papiando di 31 miyon Florin.

   “Anto, ora cu mi a lesa e verslag cu Minister a entrega na nos como Parlamentario, cu DOW ta bisa cu mester 180 miyon Florin pa pone e careteranan ‘pico bello’, kiermen si bo ta cobra 31 miyon Florin na impuesto, ta seis aña bo mester”, Parlamentario Pieters a argumenta.

   El a sigui bisa cu e 31 miyon Florin aki ta bay den caha di gobierno anto despues ta disparce, pasobra e ta bay otro caminda, mester bay directamente pa infrastructura.

   “No por t’asina cu mi ta paga tanto placa y cu si mi keda sin paga nan ta cobra mi tambe boet, anto pa mi haya un servicio di caminda na werki asina’ki. Akinan mi tin di bisa e no ta un cos di gobierno aki so, e ta un fenomeno cu a bin di tur gobierno cu a sinta te aworaki.

Kiermen, si nos mester bay over na un bestemmings heffing, caminda cu e placa ey cu ta destina pa paga number plat, paga impuesto di vehiculo, mester bay directamente na DOW pa drecha careteranan. Mester haci e cambio e ora ey, sino nos ta keda core ‘cabes di gai cu no, nos no tin placa’. Ora cu mi a lesa e verslag di minister, e ta bisa cu nos no por haci nada e aña aki ni aña cu a pasa  pasobra tin un debe acumula di varios aña di 4.5 miyon Florin. Pero di otro banda bo ta haya 31 miyon Florin. Kiermen e 4.5 miyon Florin ta representa apenas 18%. Kiermen, no bin bisa mi cu no tin placa pa paga. Cu e placa ey bo mester a paga e debe y hasta cuminza percura pa asfalt”, Parlamentario y Lider di PPA, señor Eduard Pieters a remarca.