Wardacosta a bolbe confisca droga pa di dos biaha den tres dia

Cuatro sospechoso transferi pa Polis di Aruba

• Accion riba lama cerca di Aruba 

ORANJESTAD (AAN): Pa di dos biaha den un siman, e barco di Marina Real Hulandes, Zr.Ms. Friesland  a intercepta un transporte ilegal di droga  riba lama Caribe. E barco di Marina Real Hulandes tabata nabega bao di bandera di Wardacosta di Caribe Hulandes.

   Tabata riba Diadomingo 26  di April, cu e avion Dash-8 di Wardacosta di Caribe Hulandes a tuma nota di un boto cu droga nabegando riba lama Caribe.  Zr.Ms. Friesland a reacciona mesora y tambe a manda dos boto di intercepcion rapido, tipo FRISC den direccion di e boto tipo Go-Fast cu keto bay ta moviendo riba lama, pa asina intercepta esaki.

   E dos unidadnan di FRISC a logra domina y stop e Go-Fast di sigui nabega.  Nan a detene e cuatro persona cu tabatin abordo, y a nabega e ora cu e speedboat Go-Fast pa Pier di Wardacosta na Savaneta.

   Cuerpo Policial a manda unidadnan, cu a tuma over e cuatro sospechosonan.  No a haya informacion di ki nacionalidad nan ta.  E droga a wordo baha na tera, a pisa nan, y despues di a documenta tur cos, ya a bay destrui nan.

   E tipo di operacion nan aki ta demostra un biaha mas, con importante ta pa sigui traha hunto cu tur partner den cadena hudicial na tur e islanan di Caribe Hulandes.

   E caso anterior a socede 3 dia prome, esta Diahuebs 23 di April, ora cu e barco Zr.Ms. Friesland tambe tabata activo pa intercepta e droga aki.  E biaha ey e speedboat Go-Fast tambe a stop pa e botonan FRISC di Hulanda, y tres hende a keda deteni. Nan tambe a wordo transferi pa Cuerpo Policial di Aruba pa sigui cu e investigacion.  E droga ey tambe a wordo destrui.

   Ningun di e dos biahanan aki, Wardacosta no a duna detaye ta cuanto kilo di droga a wordo confisca.