Aki dos siman...
ORANJESTAD (AAN): Prome Minister di Hulnda, Jetten lo realisa un bishita for di dia 8 te cu 14 di mei 2026 na Sint Maarten, Saba, Sint Eustatius, Bonaire, Aruba y Corsou. Esaki ta e prome bishita di Jetten na e parti Caribense di Reino den su funcion como Prome Minister. E bishita ta tuma luga mesora na inicio di periodo di gabinete, debi na e importancia cu e gabinete ta duna na un colaboracion bon y fuerte dentro di Reino.
Durante e bishita, Prome Minister lo tin combersacion cu tur e prome ministernan, gobernadornan y miembronan di Parlamento di Aruba, Corsou y Sint Maarten, como tambe cu e gezaghebbernan y consehonan insular di Bonaire, Sint Eustatius y Saba. Den e combersacionnan aki lo trata, entre otro, temanan manera resilencia, siguridad y sostenibilidad. Ademas, e bishita ta inclui un programa varia cu combersacion cu habitantenan, empresarionan y organizacionnan den comunidad.
St. Maarten: E bishita ta cuminsa na Sint Maarten, unda Prome Minister lo laga informa su mes riba tema di reconstruccion, implementacion di ley, bon gobernacion y colaboracion durante desaster y crisis.
Tambe e lo papia cu diferente organizacion riba topico cu ta biba den comunidad, manera hubentud, cuido y bienestar, turismo, comercio y NGO’s.
Saba: Diahuebs 10 di mei, Prome Minister ta biaha pa Saba. Aki e lo bishita, entre otro, e Saba Cares Nursing Home, unda e lo papia cu e adultonan mayor riba nan bida den e cas di cuido.
Tambe e lo bishita e St. Johns Enrichment Center, unda un centro di bario polifacetico ta wordo construi memey di e edificionan di scol existente riba e isla.
St. Eustatius: E siguiente dia, Prome Minister ta sali pa Sint Eustatius, unda e lo bishita e terminal di transbordo di petroleo y lo haci un caminata den stad, enfoca riba historia di sclavitud y herencia cultural di e isla.
Durante e caminata lo para keto na celebracion di Statia Day 2026, unda ta recorda 250 aña di laso cu Estados Unidos. Hulanda tabata, cu ‘The First Salute’, e prome estado cu a reconoce Estados Unidos como un estado independiente.
Bonaire: Diamars 12 di mei, Prome Minister lo ta na Bonaire. Aki e lo bishita e dump di Selibon na Lagun y lo ricibi informacion actualisa tocante enseñansa na scol primario Kolegio San Bernardo.
Despues di un combersacion na LVV Bonaire tocante un sistema di alimentacion sostenibel y prepara pa futuro, lo sigui un recorido na un proyecto di construccion di viviendanan social.
Aruba: Mas laat e dia ey, Prome Minister ta biaha pa Aruba. Aki e lo asisti anochi na e estreno oficial di e documentario riba naturalesa di Aruba, parti di e proyecto multimedia WOW! tocante e parti Caribense di Reino.
Diaranson 13 di mei, e programa ta inclui bishita na Parke Nacional Arikok, Centro Deportivo Libertador Betico Croes y un bishita na un empresa den cuadro di e areglo nobo BMKB ACS. Cu un recorido na aeropuerto Reina Beatrix, Prome Minister ta conclui su bishita na Aruba y ta sali pa Corsou.
Corsou: Na Corsou, durante un cena cu partidonan social y mundo empresarial, Prome Minister lo laga informa su mes riba e desafionan (social) di e isla. E mainta di 14 di mei ta cuminsa cu un briefing na base di Marina Parera tocante e situacion geopolitico den region Caribense. Siguientemente, un bishita na museo Tula ta riba e programa. Merdia, Prome Minister lo ta presente na un encuentro tocante fortificacion di bario. Tambe e lo haya un recorido den e parke di bateria nobo di e compania di energia Aqualectra.
Related News
Cu apertura di Cas Veneranda ta celebra un etapa pa revitalisacion di centro di Playa
Aruba Tourism Authority a ricibi premio Aquila Whalesong Destination
AVP ta malinforma pueblo pasobra rapport di ARA ta un les di crisis y no prueba di corupcion
