Premio internacional ta posiciona Claudia Daher ariba escenario literario global cu su obra “R.A.T.S: Revolutionary Army of Teens

ORANJESTAD (AAN): Despues di un fin di siman yen di emocion, e autor local Claudia Daher a briya riba escenario internacional,

destacando pa su talento y presencia den un ambiente di halto nivel profesional.

Den fin di siman, el a wordo reconoci como “Distinguished Favorite” den e prestigioso Independent Press Award 2026, un premio otorga pa su buki “R.A.T.S: Revolutionary Army of Teens – We Are One”, cu ta trata temanan importante manera resiliencia social, identidad y union. 

Claudia a desfila ariba tapijt cora y a subi riba escenario na Broadway pa ricibi su premio durante e ceremonia oficial. E celebracion a continua na Times Square, unda su logro a wordo presenta ariba billboard den un programa coordina pa Ted Olczak,  presidente di Printed Word Reviews.

Durante e evento, Claudia no solamente a briya pa su reconocemento, sino tambe tabatin honor di comparti e momento cu figuranan influyente den mundo di literatura y innovacion. Entre nan tabatin Michael Evans, conoci como e “Spielberg di AI”, y escritor renombra manera Sara Fanfarillo, Szilvia Sandberg, Michelle Hood Julien y Sieglinde Othmer. E intercambio aki a enrikece e experencia, creando momentonan di inspiracion y conexion profesional valioso.

Claudia a expresa den entrevista cu DIARIO cu e ta masha contento cu e premio aki, pa e impacto cu e buki a haya y sigur pa e sosten di su yiunan, su famia, amigonan, specialmente di su casa Kenneth kende tabata presente hunto cu ne na New York

E logro aki ta un paso fundamental den e trayectoria di Claudia Daher y na mesun momento ta pone Aruba riba e mapa literario internacional, inspirando un generacion nobo di artistanan literario.