Como 200 biker lo ta awenochi den Shoco Legends Night Ride

ORANJESTAD (AAN): Riba Diahuebs anochi, un monton di hende a acudi na The New Rudsen Bar na Jan Flemming pa inscribi pa e Shoco Legends Bike Club su King’s Day Night Ride.

  Y e cuponan a bira sold-out, y tin pues 200 biker cla pa subi caya Diasabra anochi riba un trip.

   DIARIO a indica cu e Night Ride aki ta wordo organiza riba Diasabra anochi, pa asina duna tur miembro y biker nan Dialuna liber (Dia di Rey) pa nan disfruta cu nan famia.

   E organizacion ta contento cu tur Club y Riders independiente cu a registra, y e cuponan a sold-out den como 4 ora, y nan ta contento cu esey.

   King’s Night Bike Ride lo cuminza na Chill Café Aruba pa 5:00 pm, y e salida mes lo ta 7:00 pm.  Di eynan lo bay rumbo Battata Beach Bar, y despues finaliza na The New Rudsen Bar.

   Na Chill Café lo tin DJ Jeff cu musica, y na The New Rudsen Bar lo tin DJ Jrick animando.  Ta pidi tur participante pa mantene respet y bon ambiente.  Danki na e Event Committee cu a traha duro pa trece un programa di hopi entretenimento y weganan.