Colombiano hoben di 20 aña a comete multiple atraco na San Nicolas

E ta un persona indocumenta pa colmo!

• Atraco Team a logra detene awor si 

ORANJESTAD (AAN): Un fenomenal trabao di Cuerpo Policial di Aruba!  Vocero Liliana Rasmijn a confirma, cu danki na un investigacion intensivo realisa pa Atraco Team (T.B.P.), autoridad hudicial a logra detene un sospechoso kende ta biba den distrito di San Nicolas y cu ta wordu vincula na varios atraco cu arma blanco den e ultimo dos luna aki di Maart y April 2026.

   Durante e lunanan menciona a registra un serie di incidentenan den e area di San Nicolas unda e sospechoso tabata uza un arma blanco tipo daga (conoci na ingles como ‘dagger’), pa intimida su victimanan.

  Atraconan cometi door di e individuo aki:

   (*) Riba 2 di Maart 2026: Atraco riba un studiante na altura di Biblioteca Nacional den Peter Stuyvestraat.  E studiante tabata wardando riba su mayornan y ta wordo atraca, na unda e sospechoso ta pone cuchiu na su garganta y ta bay cu su smartphone y placa.

  (*) Riba 19 di Maart 2026: Atraco riba un empleado di MFA San Nicolas na e parkeerplaats di Plaza Lolita. Sospechoso a pone cuchiu na su garganta y bay cu su smartphone, prenda y placa.

  (*) Riba 3 di April 2026: Atraco riba turistanan cu tabata admira e muralnan den centro di e ciudad. Sospechoso a saca cuchiu pa e turistanan y bay cu placa y documentonan personal.

  (*) Riba 9 di April 2026: Atraco riba un señora hunto cu su yiu despues di a sali for di cinema. Aki sospechoso a saca un cuchiu y a bay cu placa.

  Basa riba e descripcion di e sospechoso y e modus operandi, Atraco Team a logra identifica  e  persona responsabel pa tur e atraconan aki.

   Despues di un investigacion bon haci a conduci cu riba 11 di april 2026, Atraco Team a detene e sospechoso. Ta trata di e homber di inicialnan H.S.L.B., di 20 aña naci na Colombia, y e ta indocumenta riba Aruba.

   Polisnan hunto cu Ministerio Publico a dicidi na tene un razzia na un cas den Theaterstraat, polis a logra localisa y confisca basta evidencia cu ta vincula e cu e atraconan menciona. Importante pa menciona ta cu durante e proceso di interogacion, e sospechoso  ta admiti su culpabilidad den tur e casonan aki.

   Atraco Team ta traha incansablemente pa resolve e casonan di atraco.   E detencion aki ta un muestra di e compromiso firme di Cuerpo Policial Aruba pa garantiza siguridad di ciudadanonan y bishitantenan.