Pidi reunion urgente di Parlamento riba falta di transparencia den proyectonan di enseñansa sin Destaho Publico

MEP ta pone presion riba Gobierno:

ORANJESTAD (AAN): Fraccion di MEP a haci un peticion pa yama un reunion publico urgente di Parlamento pa discuti e decisionnan recien di e Ministerio di Enseñansa y Deporte, baou di Minister di Gerlien Croes, pa otorga varios proyecto pa desaroya material di enseñansa sin proceso di destaho publico.

   E decisionnan, cu segun informacion den prensa, a wordo tuma na varios ocasion, y pesey no por papia mas di un excepcion. Esaki ta causa preocupacion serio pa loke ta transparencia, oportunidadnan husto y igual pa tur hende y maneho corecto di fondo publico. Mas grave ainda ta cu e excepcion aki no a wordo uza incidentalmente, sino repetidamente den mesun ministerio, sin claridad tocante con a explora mercado of si tin otro proveedor.

   E situacion ta trece un dimension politico serio, mirando cu e mesun minister, den su periodo como miembro di Parlamento, tabata sumamente critico riba uso di e mesun tipo di excepcionnan. Awor, den su rol como minister, ta haci uso constante di e instrumento aki, creando un duda legitimo riba consistencia, credibilidad y integridad di gobernacion.

   Ademas, esaki no ta un caso isola. E minister ya a bira conoci pa su falta di transparencia, particularmente den e asunto di biahe di trabao cu avion priva, unda te awe no a duna claridad suficiente na Parlamento ni na pueblo. E patronchi cu ta surgiendo ta uno di falta di transparencia y accountability.

   Pa e motibo ey, Fraccion di MEP a pidi cu urgencia pa yama un reunion publico di Parlamento, unda e minister lo mester duna splicacion completo y documenta.

   “Transparencia no ta opcion; e ta un obligacion. Pueblo di Aruba tin derecho di sa con ta maneha nan placa y con decisionnan importante den sector di enseñansa ta wordo tuma. Parlamento lo mester cumpli cu su papel di control y supervision sin tardansa” Lider di Fraccion di MEP, Evelyn Wever-Croes a duna di conoce na DIARIO.