Derecho di trahado riba oranan liber pa bay vota dia di eleccion

ORANJESTAD (AAN):  Ministerio di Asuntonan Social y Labor Departamento di Labor y Investigacion

ta informa encuanto e oranan di trabou liber pa por eherce derecho di voto riba dia di eleccion segun e Ordenansa Electoral (Kiesverordening). 

Articulo 39 Ordenansa Electoral: 

E votamento ta cuminsa 8:00 di mainta y ta dura te 7:00 di anochi. 

Articulo 40 Ordenansa Electoral: 

1. Tur dunado di trabou ta obliga di percura pa su trahado, cu tin derecho di voto, tin riba dia di eleccion durante e tempo stipula den articulo 39 pa vota minimo 4 ora di trabou consecutivo liber, a menos cu e trahado durante e oranan cu e eleccion ta tuma luga ya caba tin 4 ora consecutivo liber riba un otro base.
2. E dunado di trabou ta obliga di percura pa mas tarda un siman prome cu e dia di vota, e trahado ta debidamente informa di e tempo cu e trahado ta haya pa vota.  

Interpretacion:

Esencia di articulo 40 §1 di Ordenansa Electoral ta cu e dunado di trabou mester percura pa den su compania e trahadonan cu tin derecho di voto riba diabierna 25 di juni proximo haya por lo menos 4 ora consecutivo liber den e periodo cu local di votamento (stemlokaal) ta habri, pues entre 8:00 am y 7:00 pm. E pensamento tras di esaki ta cu tur trahado cu tin derecho di voto mester haya suficiente oportunidad pa haci uzo di esaki.  

Excepcion:

E trahado cu den e periodo cu local di votamento ta habri ya caba tin 4 ora consecutivo liber riba otro base (p.e. e trahado normalmente ta traha mita dia so of e trahado tin un shift hopi tempran of hopi laat), no por haci un apelacion cerca su dunado di trabou pa e 4 oranan di trabou liber. 

Ehempelnan:

• E votado cu ta traha di 7:30 am te 12:00 pm y di 1:00 pm te 4:30 pm lo mester haya liber di 7:30 am te 11:30 am of di 12:30 pm te 4:30 pm.
• E votado cu ta traha ‘part-time’ di 8:00 am te 12:00 pm no por haci apelacion riba e 4 oranan di trabou liber.
• E votado cu ta traha shift di 7:00 am te 3:00 pm tampoco por haci apelacion riba e 4 oranan di trabou liber. Esaki ta conta tambe pa e votado cu ta traha un shift di 12:00 pm pa 8:00 pm of un shift di 3:00 pm pa 11:00 pm.

Adicional, na e obligacion di e dunado di trabou pa permiti su trahadonan cu tin derecho di voto e tempo liber pa eherce nan derecho di vota, articulo 1614c §4 y §5 ta stipula cu e trahado ta mantene su derecho di pago pa e oranan liber cu e ta haya pa eherce e derecho aki.

Departamento di Labor y Investigacion ta pidi tur trahado y principalmente dunadonan di trabou pa tene bon cuenta cu e informacion aki.