Dianan 24 y 25 di april, DRH lo ta presente na e Carrièrebeurs na Hulanda pa incentiva studiantenan bin bek Aruba

Directora di DRH, Omaira Lares:

ORANJESTAD (AAN): Directora di Departamento di Recurso Humano (DRH), señora Omaira Lares a duna di conoce cu tin hopi vacatura riba nivelnan HBO y WO. Segun e, e departamento ta mira hopi interes den e studiantenan di Aruba na Hulanda cu kier bin bek aki pa traha den sector publico despues cu nan termina nan estudio. 

Representantenan di DRH lo ta na Hulanda e siman entrante, na unda dia 24 y 25 di april DRH lo participa na un Carrièrebeurs cu lo tuma luga na Rai Amsterdam. Meta di e participacion aki di Aruba ta pa promociona pa trece nos studiantenan ainda na Hulanda bek Aruba. Entre otro, pa ofrece nan areglonan pa nan caba di studia, entre otro studieopdracht di un aña y despues nan bin bek Aruba pa traha. Tambe lo ofrece incentivonan pa esnan cu ya a caba di studia pa bin bek Aruba pa traha. 

El a remarca cu tambe nan lo bishita otro ciudadnan den Hulanda, entre otro Breda y lo ta disponibel na Arubahuis of na Den Haag pa esnan cu ta desea di encontra cu e ekipo di DRH riba e tema di bin bek Aruba.