Mientras cu Fiscal a exigi 12 luna di prison

Hues a suspende detencion di sospechoso complice di a hit ATM Mashin pa mas di 25 Mil Florin

ORANJESTAD (AAN): E homber Dominicano biba na Aruba, J.B. di 40 aña, apesar di ta para riba cu e no tin nada di haci cu e caso, a scucha Fiscal exigi 12 luna di prison p’e. Fiscal ta hay’e culpabel di ta complice hunto cu 2 Bulgaro caminda a horta diferente ATM Machine di Banco di Caribe. Abogado mr. Canwood a cuestiona e investigacion di Polis. Ayera mainta Hues a bisa cu e ta laga J.B. bay liber te na Mei 2026 ora e dicta sentencia.

    Sospechoso ta nenga: Tratamento di e caso a sosode siman pasa y e acusacion cu Fiscal a presenta den Corte contra J.B. ta cu entre 8 November 2024 y 20 December 2024 a horta carchi di banco hunto cu 2 Bulgaro. A haci uso di carchi di banco falsifica y lanta cantidad di placa.

   Hues a puntra J.B. kico e tin di bisa riba e acusacion. J.B. a bisa Hues cu e no tin nada di haci cu e caso aki.

   Ta asina cu 7 Maart 2026, Corte a haya e Bulgaro Z.V.D., culpabel di a horta placanan for di e ATM Machines y a conden’e na 8 luna di prison.

   Hues a bisa cu riba camera di seguridad ta mira J.B. hunto cu e dos Bulgaronan na e ATM Machine. Segun J.B., Polis a mustr’e potretnan di un persona pero esey no t’e. Hues a bisa cu riba potretnan tin un persona cu pechi cu bril di solo bisti pa e no wordo reconoce.

   Yuda cu horta ATM Machines: Hues a puntra J.B. si Polis a haci investigacion na su cas. El a bisa cu promer cu el a wordo deteni no. J.B. a bisa cu e no sa si ora e tabata cera, Polis a bay haci investigacion na su cas.  Hues a bisa cu e caso a wordo posponi pasobra

   Hues tabata kier sa con Polis ta reconoce J.B. Tin un relato di Polis cu ta bisa cu den pasado caba a detene J.B. pa caso similar. J.B. a bisa Hues cu na 2018 el a wordo deteni pa un caso similar. El a bisa cu el a wordo presiona pa esnan envolvi y e tabata core auto pa nan bay diferente ATM Machine. Na 2018 el a wordo condena na 10 luna di prison.

   Despues tabatin un otro caso. J.B. a bisa cu e conoce hende cu ta huur auto y e ta yuda hende haya auto di huur y ta gana comision cu e ta pone riba e prijs di huur. Na 2021 el a hiba hendenan na e persona cu a huur e auto. Despues e hendenan a yam’e y bis’e pa entrega e auto. Parce nan a haci un delito y Polis a detene J.B. y puntra unda e otronan ta. Despues a detene esnan culpabel na un cas cu aparato di skimming pa copia Credit Cards.

   Ta asina cu relaciona cu e caso di awor, desde October 2025, J.B. ta encarcela. El a bisa cu e ta trahando pa un compania y cu doño di e compania tin e trabao want’a p’e.

   Fiscal: Fiscal a bisa Hues cu e ta haya legalmente proba cu J.B. ta envolvi den e hortamento di placa na e ATM Machines di Banco di Caribe. El a bisa cu Banco di Caribe a haya denuncia di diferente doño di carchi cu nan no ta na Aruba pero a lanta placa for di nan cuenta. Mastercard a bati alarma na Banco di Caribe. Parce cu Banco di Caribe su ATM Machines no tabata suficiente prepara pa skimming. Mastercard a pone Banco di Caribe responsabel pa tur e placanan cu a wordo lanta.

   A reconoce sospechoso: Fiscal a bisa cu tin 6 agente di Polis cu a reconoce J.B. riba video di Security Cameranan di vigilancia. Fiscal a bisa cu el a bay wak e imagennan di video di seguridad y e ta reconoce J.B. tambe.

   Fiscal a bay hopi amplio con e carchinan tabata wordo usa hunto cu e dos Bulgaronan y J.B. tabata para patras. Mas cu 25 mil florin a lanta for di ATM Machines.

   Exigi 12 luna di prizon: Fiscal a remarca cu J.B. ya caba a wordo condena pa caso similar. El a bisa cu e no tin ningun motibo pa duda den Polis. Fiscal ta haya cu J.B. ta “wrong and strong”. Fiscal a exigi 12 luna di prison pa J.B.

   Abogado ta cuestiona: Abogado mr. Canwood a bisa Hues cu e no ta comparti Fiscal cu J.B. ta “wrong and strong”. E abogado a mustra cu den pasado tambe a wordo bisa esey y J.B. a wordo declara liber. Na opinion di abogado ta unicamente Polis lo a reconoce J.B. riba potret.

   J.B. semper a nenga cu e ta reconoce su mes y tambe no conoce e otro 2 Bulgaronan. Tin e smartphone di J.B. confisca pero no tin nada di cu e tabatin coneccion cu e 2 Bulgaronan. E abogado a bisa Hues cu e tin e impresion cu Polis a bay busca un persona cu lo tabata envolvi den pasado y a indica cu ta J.B. E abogado ta haya cu Polis no a bay investiga riba pañanan di J.B. pa mira si ta cuadra riba e videonan di seguridad.

   A viola procedimento penal: mr. Canwood a cuestiona e reconocimento di Polis di J.B. caminda ta bisa cu J.B. tin un modus operandi, esta e forma di cana y actua ta mescos cu den casonan anterior. Abogado a bisa Hues cu el a busca investigacion riba e caso 2021 caminda ta resulta cu no tin imagennan di J.B. El a remarca, con Polis ta bisa asina siendo cu no tin imagen di J.B. E abogado a remarca cu esaki no ta cuadra cu e realidad. Ta pesey J.B. a wordo declara liber na 2021 y na 2018 el a wordo condena pa a core auto pero no a baha bay na ATM Machine.

   Abogado ta haya cu intencional Polis a viola e bon procedura di caso penal caminda ta menciona cosnan cu no ta cuadra cu e realidad. Abogado a menciona sentencianan di Hulanda caminda Hues ta cuestiona cu mester haci mas investigacion y no por bay bisa cu ta reconoce e persona sin mas. Abogado a pidi Hues pa declara J.B. liber. Sino un castigo igual na loke e 2 Bulgaronan a sinta cu ta 8 luna cu ta loke J.B. a sinta caba.

   Hues a laga sospechoso liber: Diabierna mainta Hues a sera tratamento di e caso y a bisa cu e ta laga J.B. liber y dia 8 Mei 2026 lo tin sentencia. Esey ta duna indicacion cu sea Hues lo bay condena J.B. igual na e Bulgaronan of Hues ta declara J.B. liber.