E meta mas importante di e campaña ‘Cambia bo Slok’ ta pa promove bebemento di awa

Dahariana Evertsz di DVG tocante campaña ‘Cambia bo Slok’:

ORANJESTAD (AAN): Segun Señora Dahariana Evertsz di Departamento di Salubridad Publico Aruba (DVG), curpa di un persona cu ta dicidi di elimina un habito, por ehempel sucu, tin mester di 9 dia pa ‘kick off’. E departamento di salud ta encurasha tur persona cu kier cambia nan habito di uza sucu, pa cuminsa limita of baha man tur dia un tiki di esaki y reemplasa esaki cu algo bon. Esaki ta loke e campaña ‘Cambia bo Slok’ ta encera.

   Señora Evertsz den su splicacion na DIARIO, a remarca cu ta importante pa haci comparacion entre kico ta mas saludabel y accesibel of miho prijs. E campaña di conscientisacion ‘Cambia bo Slok’ ta hopi detaya y su meta ta pa educa ciudadanonan no solamente pa sa cuanto sucu ta añadi den un bebida, cuanto caloria tin den dje, pero tambe riba e prijs di esaki. Tambe nan ta haci comporacion entre e diferencia di un bebida di energia y koffie, y entre juice cu ta contene sucu of juice natural. El a enfatisa, cu pa un persona scoge bon, e mester por wak e diferencia prome.

   Sinembargo, e ta enfatisa, cu e meta di mas importante di e campaña ‘Cambia bo Slok’, ta pa promove bebemento di awa. Bebidanan cu ta contene hopi sucu, contrario na awa, ta deshidrata un hende hopi mas lihe y ta keda haya sed. Mientras si ta bebe awa constantemente, un hende lo no haya sed asina lihe y ta hidrata e curpa pa un termino mas largo, y ta un opcion hopi mas saludabel y accesibel.

   Un otro beneficio, specialmente pa mayornan cu ta bebe hopi awa, nan lo ta un bon ehempel pa nan yiunan of e muchanan rond di nan. “Si nos como mayornan of como adultonan haci e habito di bebe mas awa, nos ta influencia esnan cu ta rond di nos. Esaki ta hacie mas facil pa e transicion di e hobennan y nos muchanan cu ta rond di nos. Esaki lo resulta den un comunidad mas saludabel”, señora Evertsz a expresa.