Fraccion di MEP ta evaluando pa cuminsa un caso den corte contra Presidente di Parlamento

Parlamentario Evelyn Wever-Croes:

ORANJESTAD (AAN): Parlamentario Evelyn Wever-Croes a remarca cu Gobernador di Aruba ta cuida e Estado di Derecho. E ta cuida cu nos constitucion ta wordo respeta. Den un entrevista cu DIARIO, e parlamentario a expresa cu e ta spera cu den e reunionnan regular cu Gobernador SE Alfonso Boekhoudt tin cu Gobierno di Aruba y cu Presidente di Parlamento, e puntonan di preocupacion cu Fraccion di MEP tin, por wordo trata. Asina, segun e, tabata pasa tempo cu MEP tabata den gobierno.

   El a expresa tambe cu conociendo Gobernador, e sa cu e lo para pa democracia di nos pais. Pa cua motibo tambe, Fraccion di MEP ta yega ta na e punto cu tin cu recuri na Gobernador como ultimo recurso.

   Fraccion di MEP den varios ocacion a pidi Presidente di Parlamento Marlon Sneek pa yama reunionnan publico riba varios topico di preocupacion, pero e presidente di Parlamento no a yama e reunionnan aki. Tampoco ministernan di Gabinete AVP-Futuro ta contesta preguntanan cu ta wordo haci na nan.

   E parlamentario di MEP a duna di conoce cu Fraccion di MEP te hasta ta evaluando pa cuminsa un caso den corte contra di Presidente di Palamento Sneek. Esaki ta un caso specifico na unda cu Fraccion di MEP a pidi un reunion publico den 30 dia, pero e presidente a informa e parlamentarionan di MEP cu e lo no yama e reunion aki. Motibo cu e presidente di Parlamento a duna ta cu ambos lider di AVP y Futuro a inform’e por escrito cu nan no lo duna quorum si e reunion aki ser yama.

   Esaki, segun e parlamentario ta contra constitucion. Ora cu un parlamentario, den e caso aki, 9 parlamentario pidi pa yama un reunion, e presidente di Parlamento mester yama e reunion den 30 dia. Si parlamentarionan di coalicion no presenta e dia di reunion, e ora por papia di no tin quorum. Pero no por bisa di adelanta cu no tin quorum pasobra nan a avisa cu nan lo no ta presente.

   “Si AVP y Futuro no kier carga nan responsabilidad, nan no kier traha, nan kier gana placa sin traha, ta nan responsabilidad. Pero como Presidente di Parlamento, e tin cu yama e reunion cu a ser pidi”, Parlamentario Wever-Croes a expresa.