Plantacion grandi di Marihuana a wordo destrui na un cas na Savaneta

Razzia di sorpresa di Unit Narcotica riba Diaranson mainta

• Dos homber local a wordo sorprendi y nan a keda deteni 

ORANJESTAD (AAN): Diaranson den ora di mainta, cu sosten y luz berde di Ministerio Publico, Unit Narcotica a tene un razzia na un cas na Savaneta. Esaki tabata en conexion cu un plantacion di marihuana.

  Basa riba investigacion cu autoridad hudicial a bin ta haciendo, danki na oficialnan bakia y tambe cu tips cu a drenta, a dicidi na informa Ministerio Publico di esaki.

   Cu yudansa di tur prueba, a mustra cu ta necesario pa haci un razzia mesora.  Di e forma ey Ministerio Publico a duna luz berde, y e fecha escogi tabata Diaranson 1 di April.

   Durante e razzia aki, e habitantenan a wordo sorpendi cu e accion di Polis.  Segun Vocero di Polis, den e entrada hudicial a haya un total di 62 mata di marihuana. A detene e hende homber L.R.J.V.D.N., di 25 aña naci na Aruba, y e hende homber G.C.R., di 55 aña naci na Aruba.

   Durante e entrada hudicial a haci uzo di e unidad di K-9, Flex Team y RRT.

   Cuerpo Policial ta reafirma su compromiso cu seguridad di nos isla y ta recorda comunidad cu cooperacion di cada ciudadano ta crucial.

   Polis ta sigui informa comunidad, cu si acaso bo tin informacion riba cualkier actividad ilicito, yama e tipline di Polis na 111-41. Bo informacion ta keda estrictamente confidencial.

   E plantacion aki ta demostra cu hopi hende na Aruba mes ta cuminza planta e mata di cannabis pasobra ultimo tempo e “importacion” for di exterior a cuminza bira hopi dificil.  Cu asina hopi control riba Lama Caribe, e sistema bieu di dropping a cuminza cay un poco, y e cantidad di hende drentando Aeropuerto cu droga tambe a cuminza bira menos ultimo tempo.