Candela di seis ora largo a destrui un Centro Comercial na Caracas

CARACAS: E candela a dura 6 ora prome cu nan por a domin’e completamente! 

Pesey el a destrui casi full e Centro Comercial Galerias Quinta Crespo, cu den pueblo ta conoci como ‘Mercado de los Corotos de Quinta Crespo’ na parti west di Caracas.

   A saca unidadnan di Bombero di tur Post den Caracas pa bay traha riba e candela aki.  Nan a hasta usa Bomberonan Marino, Bomberonan di Aviacion, y Proteccion Civil, pa purba na controla e siniestro.

   Tur cos a cuminza banda di 12:40’or di marduga, cu e alarmanan a cuminza bay off den parokia Santa Teresa di municipio Libertador.  E prome unidad di Polis cu a yega eynan, a bin topa cu un candela grandi.  Testigonan a bisa cu tur cos a djis cuminza cu un ‘chispa’, cu den apenas algun seconde a crece y plama.

   Autoridadnan a cera tur e cayanan eybanda, pa asina Bomberonan por a traha cu mas facilidad.

   Ora mainta a habri, por a nota ainda presencia di Bombero cu tabata sigui basha awa riba e resto di e area kima, cu tabata sigui saca huma.