Departamento di Asunto Social ta lansa encuesta ‘Satisfaccion di Cliente’

ORANJESTAD (AAN): Den cuadro di e trayecto di e certificacion di Organisacion Internacional pa Standarisacion (ISO),

Departamento di Asunto Social (DAS) ta continua trabou activamente riba mehoracion continuo di e departamento y su servicionan.

ISO ta un sistema di standardisacion reconoci mundialmente, cu ta establece criterio pa diferente aspecto di operacion di un organisacion, manera e calidad di servicio, proceso interno, maneho di informacion y seguridad. Pa medio di e proceso aki, organisacionnan por evalua y mehora con nan ta traha, cu e meta di ofrece un servicio mas eficiente, confiabel y transparente na e clientenan.

Un parti importante di e trayecto aki ta scucha e opinion di e clientenan. En conexion cu dia internacional di trabou social,  ariba  17 di maart 2026, DAS ta lansa un encuesta dirigi specificamente na clientenan bou di e titulo “Satisfaccion di Clientenan”.

Cu e iniciativa aki, DAS kier haya un mihor comprension di con clientenan ta experencia e servicionan cu nan ta ricibi for di DAS. E opinion y experiencia di e clientenan ta di gran importancia pa identifica kico ta funcionando y unda tin espacio pa mehoracion pa responde mihor e necesidad di nos clientenan.

E encuesta titula  “Satisfaccion di Clientenan” ta disponibel den dos idioma: Papiamento y ingles. E encuesta ta consisti di 21 pregunta y ta tuma aproximadamente 10 minuut pa por completa. E encuesta lo ta habri desde 17 di maart t’e cu 31 di mei 2026. Participacion den e encuesta ta completamente boluntario. Tur opinion ta ser trata cu confidencialidad y lo contribui directamente na e proceso di mehoracion continuo di e departamento.