Si SADA entrega keho na ILO lo causa un marca negativo pa tanto Aruba como Hulanda

Segun Presidente di SADA, señor Edward Maduro:

ORANJESTAD (AAN): Sindicato SADA desde 2017 ta enfrenta obstaculonan bou di e maneho di director di Aduana, Roderick Croes. Segun e presidente di SADA, señor Edward Maduro, e situacion a bira mas serio ora cu aña pasa un miembro di directiva a ricibi un accion disciplinario. Esaki no a haya aprobacion di e directiva di e sindicato.

   Maduro a expresa cu mientras no tin un solucion cla di parti di Gobierno, y e ley y maneho interno ta sigui stroba e trabao sindical, no tin mucho sentido pa continua cu e directiva actual. El a duna di conoce cu si no tin solucion pronto, e chens ta grandi cu e directiva actual lo entrega retiro completamente y ta considerando di entrega keho na nivel internacional, entre otro na International Labour Organization (ILO)

   Segun Maduro, un gobierno cu ta prefera, cu bou di su maneho un sindicato stop di existi, pasobra e gobierno a permiti persecusion sindical, y e sindicato entrega keho formal na nivel internacional, lo causa un marca hopi negativo riba su historia.

   Segun señor Maduro, e tipo di accionnan aki ta pasa den otro paisnan di tercer mundo na unda tin biaha hasta nan ta asesina sindicalistanan pa para pa derechonan di nan trahadornan.

   El a sigui bisa cu si gobierno di Aruba permiti cu keho ser entrega na ILO pa e motibo aki, Hulanda tambe lo haya e sla. Pasobra Aruba ta parti di Reino y Hulanda ta afilia tambe na ILO cu ta un asociacion cu ta respeta derechonan cu ta afilia na sindicatonan. Esaki lo marca un berguensa hopi mahos na un nivel internacional cu lo afecta tanto Aruba como Hulanda.

   Señor Maduro a expresa cu sindicato SADA ta un sindicato cu ta hopi activo cu semper a trata na yega na solucionnan na mesa. Sinembargo, ora cu no yega, mester tuma otro stapnan. Den cualkier trabao, un trahado tin derecho di afilia na un sindicato. Y ora un sindicato ta uni y tin forsa di su miembronan, ningun gobierno y doño di trabao, no por stroba derecho di niun trahado. SADA ta conta cu sosten di su miembronan. Sin directiva no lo tin sindicato, y sin sindicato, e situacion lo empeora.