Hof a pospone tratamento di procedura pa laga asesino den libertad

Riba peticion di Procurador General

• Cornelio ta sintando castigo di bida largo

 ORANJESTAD (AAN): Dialuna mainta Hof di Corte Superior a cuminsa cu e procedura pa mira si ta honra e peticion di Cornelio Antonio Hermanus di 67 aña pa e sali liber. Hof a bay di acuerdo cu e peticion di Procurador General (PG) pa pospone e procedura door cu falta mas informacion.

   Condena bida largo pa asesinato: Na aña 2006, Cornelio Hermanus a wordo condena na bida largo den prison. El a wordo haya culpabel di a hinca Raul Croes cu cuchiu den garganta cu consecuencia fatal.

   Ta asina cu den pasado Cornelio a sinta castigo caba na Hulanda pa a mata dos hende y despues a bin Aruba y asesina e victima. Esey a pone cu Corte di Husticia a condena Cornelio Hermanus na bida largo den prison.

   Famia di victima no a presenta: Den sala di Corte tabata presente un comision “Bida Largo” cu ta consisti di hendenan di Ministerio Publico, KIA. Di KIA tabatin trahadornan social, psycologo. Presidente di Hof a remarca cu e no ta mira famia di e victima den sala.

   El a puntra PG si a invita e famia pa ta presente. PG a bisa Hof cu el a invita e famia pero ningun familiar di e victima no a presenta. Ta asina cu e famia a manda un carta pa Hof cu nan opinion pa cu e peticion di Cornelio Hermanus pa e haya libertad.

   Pidi pa haya libertad: Presidente di Hof a bisa cu segun ley, despues di 20 aña sera den prison, e acusado por haci peticion pa e haya su libertad. Tin henter un procedura cu mester sigui. Hof a bisa cu Gobierno di Aruba mester ofrece e posibilidadnan pa asina Cornelio Hermanus por bay liber.

   Ta asina cu tin un procedura hopi largo cu a cuminsa cana for di 2024, caminda a consulta cu psychiaternan, psycologonan, Reclassering, trahadornan social di KIA. Tin cantidad di raportnan cu Hof a haya pa asina tin un bista si Cornelio por haya su libertad.

   PG a pidi pa pospone e procedura: Hof a bisa cu PG a manda su opinion riba papel caminda e ta pidi pa pospone e procedura. PG a hiba palabra den Corte caminda el a bisa Hof cu e no ta haya cu awor ta e momento pa trata e procedura. PG a bisa cu a base di tur e raportnan di evaluacion, e ta haya cu mester percura cu e medidanan y tratamento di Cornelio ta bon planifica. Esey ainda no ta completa.

   PG a splica Hof cu ya tin un cas sigur na unda Cornelio por bay keda pero no tin idea si e bario lo accepta. PG ta haya cu mester percura cu e condicionnan di tratamento y anda cu Cornelio ta solido. Awor aki no ta asina. PG a bisa cu Reclasering a bisa cu na Mei 2026 lo por tin un mihor bista riba Cornelio. PG a pidi Hof pa pospone e caso aki te na Mei 2026.

   Cornelio kier ayudo: Hof a bisa Cornelio cu hopi ta depende di su mes. E no por sinta man cruza y spera cu tur cos ta cay for di cielo. Hof a bisa cu segun ley, si awor no ta posibel pa laga Cornelio liber, dentro di 5 aña, Cornelio por haci un otro peticion y asina lo por sigui cada 5 cinco.

   Hof a mustra cu segun psicologo, Cornelio no tin sentido di culpa di a mata. E no ta wak su mes critico. Esey ta un preocupacion pa mira con Cornelio lo bay actua den comunidad, con e lo atende cu un conflicto cu lo por presenta.

   PG a bisa Hof cu for di KIA lo bay cuminsa duna cursonan na Cornelio. El a bisa cu tur esnan envolvi lo bay traha hunto riba e tratamento y guia di Cornelio. PG a bisa cu e ta preocupa cu te ainda no tin nada concreto. Ariba pregunta di Hof si Cornelio lo kier ayudo, Cornelio a bisa cu e mester ayudo. El a bisa cu e tin hopi aña sera den KIA y no tin ningun problema den KIA. E kier ayudo pa e por re-socialisa. El a bisa cu el a perde un wowo. E tin un rudia malo, lomba malo, problema cu circulacion di sanger.

   A pidi famia di victima pordon: Hof a mustra cu psicologo ta mustra cu Cornelio no ta responsabiliza pa loke el a haci y no ta mustra di tin duele. Cornelio a reacciona cu ta duele di loke a pasa. El a bisa Hof cu e incidente no mester a pasa mes.

   El a bisa cu den KIA ora tin situacionnnan tenso e ta aleha. Hof a mustra cu den comunidad, Cornelio lo hay’e cu diferente tipo di situacion y a puntra si Cornelio ta habri pa esaki. Cornelio a bisa cu e ta habri. Hof a mustra cu psicologo di KIA a bisa cu Cornelio a nenga di haya tratamento. Segun Cornelio, nunca el a nenga. Cornelio a bisa cu su deseo ta pa reuni cu su famia. El a bisa cu na KIA e ta haya bishita di 1 persona so. Segun Cornelio, tin rumannan cu a fayece e no a haya chens di bay entiero. El a bisa cu el a pidi pordon na famia di e victima y tambe e ta pidi Hof pordon. El a bisa cu e ta resa tur dia y pidi Dios pa pordon’e. Psicologo di KIA a splica Hof cu anterior Cornelio tabata pensa cu e ta keda den KIA y no tabata kier tratamento. Awor cu e situacion aki a presenta, e ta mira cambionan den Cornelio. E ta kere cu mester di mas cu 3 luna pa caba di stimula Cornelio. Hof a bisa cu nan tin copia di e carta di pordon cu Cornelio a manda pa famia di e victima.

   Abogado: mr. Croes a bisa Hof cu e conoce Hermanus pa hopi tempo. El a representa Hermanus tempo di apelacion di e caso di asesinato. El a bisa cu Cornelio ta soña loke a pasa y ta areprenti loke a sosode. El a bisa cu en total Cornelio tin 40 aña sera.

   Hof a pidi mas rapport: Hof a pospone e caso un rato pa pensa kico lo bay haci. Ora Hof a bolbe, a duna di conoce cu ta pospone e caso te 31 Augustus 2026 pa 10’or mainta. Hof a bisa cu na Mei 2026 lo bay tin un evaluacion.

   Hof ta spera cu na Mei via PG, Hof lo haya sa con a bay cu e plannan di accion. Hof kier pa esnan cu ta atendiendo cu Cornelio, tambe bisa con ta bayendo y duna un bista cla kico ta e plannan di atencion y tratamento di Cornelio.

   Caso posponi: Hof a bisa cu na Augustus 2026, Hof kier un raport completo di tur esnan envolvi cu Cornelio. Hof kier pa e dos psikiatranan y psicologo haya tur e relatonan pa nan tin nan comentario y posibel plannan. Hof a bisa cu e mester haya tur e relatonan 2 siman promer cu 31 Augustus 2026 pa asina studia esakinan debidamente. Hof a enfatisa cu ta e evaluacion di tur y e esfuerzo di Cornelio ta pone kico lo bay pasa. Hof a instrui PG pa percura cu e famianan di e victima ta presente den Corte.