Awe sentencia ta cay pa grupo cu a haci 3 atraco cu violencia riba un dia

ORANJESTAD (AAN): Awe e hombernan Z.T., J.A., D.P. y A.F., ta haya sa decision di Hues den e caso penal cu Ministerio Publico a cuminsa contra nan.

E grupo aki ta wordo acusa cu riba 3 Augustus 2025 a comete 3 atraco cu violencia y menaza hende cu arma. E lugarnan cu e grupo aki a bay haci atraco cu violencia tabata Coconuts, Kalibra y Lekker Bar & Restaurant.  Na Kalibra situa na South Beach, hasta un agente di Polis a bira victima y a wordo maltrata.

   Fiscal a baha pisa: Luna pasa, 21 Januari 2026, tratamento di e caso a tuma lugar caminda Fiscal a bisa Hues cu e caso aki ta parce un pelicula. Riba un anochi 3 Augustus 2025, 3 atraco cu violencia a sosode. Maltrato di hendenan y menaza cu arma. Fiscal ta cuestiona e hecho cu ningun di sospechosonan no ta para responsabel. Fiscal ta haya cu J.A. a haci dos atraco cu violencia y Z.T. a menaza e tata di e dos hobennan cu arma. Esaki den Coconuts caminda e victimanan ta turista.

   Na Kalibra, J.A. a bay ranca cadena di S., un agente di Polis y ademas di J.A., Z.T., D.P. y A.F. a maltrat’e. Tur esaki por mira riba video di seguridad. Mientras cu S. tabata benta riba suela, nan a sigui bati’e. D.P. a expresa na warda di Polis con bon el a sinti ora el a bati e agente di Polis. Fiscal a bisa cu e no ta haya Z.T., D.P. y A.F. culpabel di atraco cu violencia y a pidi Hues pa declara nan liber. Pero Fiscal si ta haya cu nan ta culpabel di maltrato pisa di S.

  Na Lekker Bar & Restaurant, J.A. atrobe a ranca cadena di e homber F. Despues Z.T. y D.P. a bati’e. Un rato despues Polis a detene J.A., Z.T., D.P. y a haya den e auto e cadena di F. Tin hendenan cu a bay yuda e victima F., a wordo menaza door di Z.T. cu arma. Fiscal a pidi Hues pa declara A.F. liber pasobra no por mustra cu e tabata envolvi pero si tin sospechoso cu e tabata presente.

   Fiscal a sigui bisa cu Polis a sigui nan tras y a mira maniobra sospechoso cu nan a haci cu e auto. Despues di a detene nan, Polis a bay bek na altura di un lugar na Noord y a haya un pistool. Investigacion ta mustra cu e pistool a wordo benta for di e auto ora cu Polis tabata core nan tras. Tur esaki ta mustra cu ta Z.T. tabata usa e arma y D.P. a tira e arma for di e auto.

   Fiscal a mustra cu tres di e victimanan tabata turista. Esnan den Coconuts. Pa cu castigo, Fiscal a bisa cu e ta tene cuenta cu posecion di arma na un lugar publico ta 21 luna di prison. Atraco cu violencia ta 24 luna di prison. Aki no ta trata di 1 sino 4 victima y cu a usa violencia caminda 3 tabata turista! E acusado J.A. di 20 aña a admiti tur cos. Fiscal a mustra cu Z.T. ta un residivista. D.P. ta un residivista y no ta mira seriedad di su delitonan. Fiscal a remarca cu algun dia cu D.P. a wordo laga liber, e ta bolbe cay sera. Fiscal tambe a cuestiona D.P. su expresionnan na warda di Polis. Fiscal a bisa cu A.F. ta un recidivista y ta bolbe haci delito den su tempo di prueba.

   Fiscal a exigi 4 aña di prison pa J.A., 3 aña di prison pa D.P. di cual 6 luna ta condicional cu 3 aña di prueba. Fiscal a exigi pa Z.T., 3 aña di prison y pa A.F. 12 luna di prison. Ademas di e castigo exigi mester pone acerca e castigo condicional manera Fiscal a menciona.

   DIARIO lo informa kico tur a sosode den sala di Corte.