Minister di Husticia no a extende e programa Hunto Pa Progreso

Informacion cu ta circula riba red social no ta cuadra cu realidad

ORANJESTAD (AAN): DIMAS kier informa comunidad cu e trayectonan di Hunto Pa Progreso a yega na su fin oficial dia 31 di december.

Ademas, e areglo temporal cu tabata permiti migrantenan sin status legal pa bolbe boluntariamente nan pais di origen sin prohibicion di reingreso, tambe a termina dia 31 di januari.

DIMAS ta enfatisa cu Minister di Husticia NO a extende e programa Hunto Pa Progreso. Tur informacion cu ta circula riba red social y den gruponan di WhatsApp indicando lo contrario, no ta cuadra cu realidad.

Solamente fase 2 cu ta e derecho pa traha den caso di reunificacion familiar y pa studiante y fase 3 cu ta e permiso Flex di maximo 5 aña, di Hunto Pa Progreso a wordo incorpora como procedemento regular, y esakinan lo continua conforme e marco legal vigente.

Nos ta pidi publico pa busca informacion oficial y pa no basa nan decisionnan riba rumor. Pa informacion oficial y corecto, sigui solamente e canalnan oficial di DIMAS na www.dimasaruba.aw