Siete persona indocumenta gara ta trata di drenta Aruba

Monton di droga confisca

ORANJESTAD (AAN): Diaranson marduga, radar marino a detecta un boto sospechoso nabegando den direccion di Aruba.  Mesora Centro MOC di Wardacosta a laga saca un boto special Metal Shark, como tambe un avion a lanta vuelo pa bay vigila.

   Na momento cu e oficialnan den Metal Shark a yega cerca, nan a tuma nota cu ta trata di un boto cu 7 persona riba dje. Den e boto tambe a mira diferente pakete abordo. Inmediatamente a intercepta e lancha y a bin cu ne bek pa Pier na Savaneta pa asina continua cu e caso. Ta trata di 7 hende homber indocumenta di nacionalidad Venezolano y un cantidad di droga cu nan a purba di hiba Aruba.

   Tambe a pidi asistencia di e helicopter di Wardacosta pa ehecuta un control riguroso na diferente parti di costa di Aruba . Den un bon cooperacion hunto cu diferente departamento di Cuerpo Policial di Aruba, a logra di detecta y tambe recupera un cantidad di pakete den area Noordoost di Aruba. A entrega tur 7 individuo y tur droga na Cuerpo Policial. Miembro nan di Cuerpo Policial lo continua cu e investigacion y entretanto a logra di destrui tur droga.