‘No tene miedo, no pensa malo, no huzga ya cu Polis ta bo amigo y tey pa yuda’

Rodney Solognier, President di SPA cu yamada pa pueblo:

ORANJESTAD (AAN) -- Presidente di Sindicato di Polis, SPA, señor Rodney Solognier, kier a haci un yamada na comunidad, pa no tene miedo, no pensa malo, no haci di huez pa huzga.

   “Tur cos ta cana manera mester ta, nos ta bolbe duna condolencia na e famia, pasobra e situacion cu a sosode Diamars atardi na Pos Abao ta lamentable, tanto pa e famia como pa nos di KPA tambe, pero nos tey semper pa sirbi pueblo.

   “Pero si mañan ta resulta, na un manera di bisa, cu e dos cabayeronan polis ta fout, tur hende lo haya nan dia, tur hende lo haya nan castigo. E ta simplemente, tempo lo dicta y lo wak kico ta kico. E ta aworaki fuera di nos alcance di sindicato, di Cuerpo Policial, y e ta den man di Landsrecherche, nan ta haci nan trabao, despues lo bay Corte y tin un huez cu lo dicta kico ta kico.

“Mi ta pidi comprension cu esey,  nos sa cu ta fastioso, mi no kier ta na e famia su luga, pero aworaki nos tin cu biba cu e realidad cu e procesonan tin cu sigui, y nos tin djis cu wak kico lo pasa. Pero no pa bay trece miedo den comunidad, cu polis t’esaki cu polis t’esaya. Polis ta bo amigo, polis ta purba di yuda, polis kier trece armonia den nos tur”, Rodney Solognier, Presidente di SPA, a conclui.