Grupo di hoben den Caribe Hulandes a pidi participacion den reunion di IPKO

Carta manda pa tur tres president di Parlamento

• Nan kier djis 10 minuut di tempo pa duna discurso 

ORANJESTAD (AAN): Den fin di siman, DIARIO a tuma nota cu un grupo di hoben di isla Aruba, Corsou, y St. Maarten a dirigi un carta urgente pa tanto President di Parlamento di Aruba, Marlon Sneek, tambe president di Parlamento di Corsou, Fergino Brownbill, y tambe president di Parlamento di St. Maarten, Sarah Wescot-Williams.  Nan a manda e peticion tambe pa Edgard Vrolijk, kende ta president di vaste commissie Koninkrijksrelaties, Aruba.  A mande tambe pa e griffiernan di tur tres pais.

   Nan simple peticion, ta pa inclui nan den e agenda y derecho di declara algo durante reunion di IPKO cu lo ser teni na final di Februari 2026, e biaha aki na Aruba.

   E carta ta firma pa Oriana Wouters di Aruba, Terence Ching di Corsou, y Riddi Samtani di St. Maarten.  Nan ta splica Parlamentarionan cu clima aworaki ta un responsabilidad comparti.

   Nan ta mustra cu e crisis climatico ta menaza e derechonan fundamental di habitantenan di Caribe Hulandes.  Mientras cu Hulanda na Europa por conta cu e Ley Delta y marconan financiero structural, e islanan sinembargo no tin garantianan similar.  Na nivel internacional, Reino Hulandes ta wordo mira como estado miembro, door di cual Aruba, Corsou y St. Maarten no tin acceso independiente na fondonan internacional importante pa clima.

   Den e contexto aki, e hobennan a mustra aki e caso climatico cu ocho habitante di Bonaire, hunto cu Greenpeace, a start contra estado.  E sentencia di dia 28 di Januari venidero ta crucial pa henter Reino Hulandes.  Un di e demandanan fundamental den e caso aki no ta djis e elaboracion di un plan di adaptacion climatico, sino tambe cu e plan aki ta wordo elabora den colaboracion estrecho cu habitantenan local.  Nan ta considera cu esaki ta un precedente impoirtante: E garantia di e derechonan humano via di funcion di garantia di Reino (articulo 43 di Statuto), manteniendo autonomia local y e autodeterminacion.

   Experticio y ciencia local: E islanan den Caribe Hulandes ta conta cu hopi talento cu ya ta haciendo un trabao profundo riba tereno di clima.  Nan ta completamente capacita pa reuni conocementonan cientifico y traduci nan na e contexto local pa marca asina di berdad e diferencia.  Proyectonan manera “Feeling Hot Tool” a mustra cu e experticio tey, pero e iniciativanan aki hopi biaha ta keda limita na djis ‘proyectonan temporal”.  Pa un futuro sigura, e cooperacion structural dentro di Reino ta necesario, unda Hulanda ta facilita y e paisnan ta dirigi e maneho a base di e asistencia mutuo (articulo 36 di Statuut).

   Nan peticion: Awor oficialmente, e hobennan di Caribe ta haci e peticion na e Parlamentarionan lo siguiente:

(1) Adaptacion di lima y e impacto di recien hurisprudencia (Klimaatzaak Bonaire) pa inclui esaki como punto vast di agenda pa e reunion di IPKO dia 17 di Februari 2026.

(2) Duna un chens di 5 pa 10 minuut pa un di e hobennan representante aki, esta Oriana Wouters di Aruba, na e apertura di e punto di agenda aki, un chens pa papia y duna informacion riba e vision local aki.

   Nan ta convenci cu IPKO ta e plataforma corecto pa asina papia riba e reto amplio den Reino Hulandes y informa tur Parlamentario.  Awor nan ta spera di por haya un reaccion si esaki ta posibel.  Riba e potret aki por mira Oriana Wouters, kende den pasado DIARIO a entrevista den cuadro di proyecto “Mapa di Calor’, y e ta encabeza e organizacion local IDNOVA.