Traspaso oficial di edificio John G. Eman pa Monumentenfonds Aruba

ORANJESTAD (AAN): Despues di un aña y 25 dia cu a firma un acuerdo di intencion pa compra di e edificio di John G. Eman Bank na Caya Betico Croes,

dialuna ta logra otro paso mas pa yega na e restauracion di e bunita monumento den centro di Oranjestad.

  Den presencia di Prome Minister, Mike Eman, Minister di Finansa, Asuntonan Economico y Sector Primario, Geoffrey Wever, representantenan di Aruba Bank, representantenan di famia Eman y directiva di Monumentenfonds Aruba, a haci e traspaso oficial di e edificio di Aruba Bank pa Stichting Monumentenfonds Aruba (SMFA). Cu E traspaso ta bin na un momento special den e mesun aña cu e celebracion di 100 aña di Aruba Bank.

  Alavez a firma un acuerdo di huur cu Minister Wever pa Centraal Bureau voor Statistiek Aruba (CBS) y Sociaal Economische Raad (SER) cu lo ta e usuarionan despues di restauracion. Monumentenfonds ta den combersacion ainda tambe cu potencial huurdonan pa un espacio di horeca. E combinacion di oficina y horeca ta ideal pa e monumentonan por ta accesibel tambe pa publico en general.

   Financiamento: Pa cada proyecto di restauracion SMFA ta busca financiamento tanto local como na Hulanda. Den e caso di e Monumento di John G. Eman, a ricibi un subsidio di Gobierno di Aruba pa un parti di e compra. Pa e restauracion a logra un prestamo na interes abou na Nationaal Restauratiefonds cu lo ta co-financiado hunto cu Aruba Bank.

   Siguiente paso den e proyecto ta e proteccion di e edificio como monumento. Esaki ta den man di Monumentenbureau. Mientras ta warda riba e proteccion, Monumentenfonds lo inicia e proceso di busca un arkitecto, crea un bouwteam, haci investigacion y traha riba e diseño final pa e proyecto. Ta calcula cu e trabaonan di restauracion lo inicia pa fin di 2026 y termina na 2027/2028.

   Balor historico y siguiente pasonan: E edificio tin un arkitectura unico y tipico di añanan trinta y tin un balor monumental pa cual pronto lo por haya su proteccion. Cu e traspaso di awe ta pone e prome paso no solamente pa restaura, pero tambe pa conserva su balor historico y na mes momento dun’e un funcion nobo cu ta contribui na revitalisacion di Oranjestad.

   SMFA ta gradici na Gobierno di Aruba, Aruba Bank, Nationaal Restauratiefonds y famia Eman pa e colaboracion pa haci e proyecto aki realidad y contribui na preserva nos pasado pa futuro