Aruba tin oficialmente hopi mas bendedor di klapchi compara cu aña pasa

Awor tin 63 bendedo riba e isla

ORANJESTAD (AAN): Desde Diasabra mainta pa merdia, ta diferente comerciante a habri nan negoshi y cuminza bende klapchi.  Esaki a socede na final di un trabao logistica grandi, envolviendo trucknan di carga, varios van, pickup, cu vigilancia di Polis y tambe DOW for di marduga na deposito di Wela.

   Varios rebendedor a ricibi nan mercancia e mainta ey na nan punto di benta, y mester a core pone tur sorto di klapchi y vuurwerk riba reki, pone prijs, y alavez cumpli cu reglanan estricto cu Gobierno ta stipula pa cada vergunning emiti rond di Aruba.

   E biaha aki na 2025, un total di 63 localidad a ricibi permiso pa bende klapchi den 5 dianan stipula pa haci esey.  Esaki tabata solamente 48 localidad den 2024.  Esaki ta un aumento di como 131% di mas bendedor na Aruba.  Esaki ta di compronde, como cu aña pasa debi na problema logistico pa haya klapchi for di China, ta hopi bendedor a opta pa no habri nan negoshi.

   Klapchi di 2024 y 2025 ta OK: Pa aña 2025, cada bendedor tin di tene nan mes cu reglanan mas estricto.  Por ehemplo si nan ta bende pagara, nan mag di tin den e container solamente 1 pagara pa muestra.  E restonan mester ta warda otro caminda.

   Tur e dianan aki, diferente team di Polis, hunto cu DOW, Brandweer, DTI, y DVG ta pasa haci control na tur 63 bendedor di klapchi.  Aki nan ta check si e vergunning ta poni na un lugar visibel, ta check si e lugar di benta ta limpi, si paden ta maximo un pagara ta poni, y si tur klapchi bendi ta di aña 2024 y 2025.

   Bendemento ta socede oficialmente, for di ora cu solo sali, te cu 9:00 pm.  Tur bendedor mester cera nan lugar pa 9’or di anochi.

   Tambe nan ta check si acaso ora di bende klapchi cu clientenan menor di 12 aña, pa double-check si e mucha ey ta eynan hunto cu un mayor.  No mag di bende mucha klapchi nan so.  Si e team descubri e comerciante ta bendiendo klapchi cu un mucha bao 12 aña sin ningun famia of amigo adulto presente, autoridad por duna e comerciante un multa, kita su vergunning, y cera su lugar mesora.

   Un suplica na comunidad pa keda vigila ora bo yiunan ta tirando klapchi, y por fabor evita di tira klapchi e dianan aki den marduga y stroba nos adultonan mayor y baby di drumi trankil.