E sistema di Botica na Aruba y AZV

The content originally appeared on: Diario

Un seguro medico mester di dirigente medico y financiero — *Botica na Aruba  ta combinacion di “drogisterij” y “apotheek”  — *E “Apotheker” ta haci posibel pa tin un relacion Botica y AZV


ORANJESTAD(AAN)—Cu Covid-19 a crea problemanan serio pa gobernantenan y miembronan di comunidad, ta algo cu no mester di discusion.

E pregunta ta, con ta yega na solucion.

Un bon solucion mester ta solido (basa riba e baranca di realidad) pero tambe duradero, pa evita cu e ta basha abou despues di algun dia manera a pasa cu AZV.

Pa yega na solucion pues mester papia palabra cla, cu ta cuminsa cu e necesidad cu AVP tabata tin pa tin un herment prome cu eleccion y a haci su mes doño di un concepto di MEP pa un aseguro medico general, cu no a wordo introduci dor di MEP pa e cantidad di problemanan cu e por a trece y a trece.

AVP bou Prome Ministro Henny Eman a introduci AZV y a pone AZV den man di e persona cu tabata dirigi su asuntonan social.

E prome problema grandi cu AZV a conoce, a bira un inundacion di trabou pa DIARIO, pasobra e ley cu AVP a introduci a haci cu seguronan y nan clientenan no tabata sa ta con ta haci e areglo financiero final prome cu seguronan medico na Aruba mester a cera nan porta y asina un ala di democracia a muri.

Pa bolbe na nacemento di AZV, e pregunta grandi ta, unda e factornan principal di un aseguro medico a keda.

Mester a permiti un experto den Administracion Medico, cu conoce e mundo di cifra y di medicina, pa dirigi AZV, sigur teniendo na cuenta con mundo di seguro (incluso seguro social) y mundo di cuido medico, a desaroya y ta sigui desaroya.

Un asina yama Public Health Administrator mester tabata encarga cu AZV. Un experto cu tambe mester a tene na consideracion e situacion unico di Aruba, cu no por wordo compara cu Reino.

Aruba tin un comunidad chikito y entrada limita. Esaki ta haci cu tur servicio y producto di e pais, tin mas chens di ta mas costoso cu na un pais grandi cu mas volumen di benta, di trabou y di necesidad, loke ta aplicabel pa Cuido Medico tambe.

Na Hulanda con grandi e necesidad pa manda hende exterior pa cuido medico ta?

Cuido Medico ta mes acesibel na Aruba cu e ta na Hulanda?

Pa por ta na haltura di problemanan cu Pueblo ta confronta, DIARIO ta tuma informacion cerca fuentenan na haltura y uno di e problemanan grandi cu Aruba ta confronta, ta remedi cu ta presente tambe den e discusion entre Hulanda y Aruba.

Nos por ta den mes Reino, pero riba hopi tereno, Aruba ta diferente di Hulanda.

Na Aruba nos ta cumpra remedi na Botica, caminda tambe nos ta cumpra cantidad di articulo cu no ta remedi, pasobra Botica na Aruba no ta “apotheek” (farmacia), pero “drogisterij” (drug store)”.

Solamente ora Botica ta na warda, e ta fungi solamente como Botica.

Pero awor cuanto Botica mester tin pa cuanto habitante? Si Botica atende solamente remedi, cuanto Botica por tin na Aruba?

E unico instancia cu por bende remedi ta “Receptuur” di un botica y ora papia di remedi cu mester di recept di un dokter y solamente por wordo traha dor di un “Apotheker” cu un estudio medico na nivel dokter specialisa.

Pa Aruba por haci uzo di Botica como parti di Cuido Medico, tin un Inspeccion di Remedi.

Ora papia di prijs di remedi, cuanto transportacion di remedi ta costa na Hulanda y na Aruba?

 Cuanto compania cu ta produci remedi tin na Aruba y cuanto tin na Hulanda?

AZV a nace como stunt politico. Punto. Pero bida di hende ta na wega.

Mester acepta cu tin hende ta abusa di facilidad pa haya remedi. Pero a yega e momento pa remedi haya su luga den comunidad.

Exponentenan di nos comunidad mester por bini hunto pa atende temanan cu no por wordo trata na forma superficial.

Finalmente mester dicidi si AZV ta keda exclusivo of ta habri porta pa seguro comercial pa medio di cual un ciudadano ta dicidi libremente si e kier paga placa pa recept of e ta prefera un seguro den cual tambe su prijs di remedi ta incluina un forma aceptabel.