Diasabra atardi...
ORANJESTAD (AAN): Autoridadnan hudicial a cuminza cu un investigacion pa asina trata na determina e causa exacto cu un teenager a ser haya morto na un cas na Sabana Liber na Noord.
Tabata Diasabra atardi cu tanto patruyanan di Polis di Noord, tambe Polis di Bario a ser manda na e adres. Via di Centro di Alarma, a despacha un Ambulance tambe pa check kico ta pasando cu e menor di edad.
Autoridad a haya informacion cu hendenan a bin haya un hoben di apenas 17 aña di edad, a ser haya cu curpa tur biña, y e no ta reaccionando.
Paramediconan a core baha bay atende e hoben, pero a bin nota cu e no tin pulso. A pone mashin di ECG na su curpa, y esaki a confirma cu curason ya no ta batiendo mas. Nan no por a haci nada mas, y a pidi Polis pa manda busca Docter.
Via di Central di Polis, a manda busca un Docter di e team forensico di BFTO, cu a yega y a constata morto di e victima. En realidad no a drenta ningun informacion mas riba e causa exacto, pero e hecho cu un persona su curpa y cara a cambia di color pa biña, por ta indicacion cu tin nivel abao di oxigeno den curpa debi na un problema medico, manera Asthma of Malesa di Addison, of emergencia manera venenamento di carbon monoxido. Un persona cu haya ataca di epilepsia tambe por pone cara di un persona cambia di color. Un atake di curason of fayo di curason tambe por haci esey.
Pa awor, e investigacion tin di determina exactamente loke a socede, pues tur e teorianan menciona aki ta djis un hipotesis.
Na famia y amigonan di e hoben ta bay palabranan di condolencia.
